..دخلت المطبخ صدفة كده قبل ما انام ..لاقيته نصه غرقان مياه!! و المصدر ماكينة المياه
ما بقتش عارفة اعمل ايه !! البيت كله نايم ..وانا استحالة اشيلها ممكن ظهري يموت اكتر ما هو ميت اضطريت اصحي جوزي لأن لازم حد يشيل العبوة التقيلة اوي دي .. والا هتكمل تغرق الدنيا..
فصلت منها الكهرباء احتياطي بدل ما نتكهرب.. و ابتديت رحلة إزالة آثار الكارثة بقي مع نفسي بعديها..
احساسي بصراحة كان وحش قوي.. بتاع ايه يعني المطبخ يتمسح بمياه معدنية! و في ناس بتموت علي كوباية ماية.. احساس بجد بيوجع.. يقهر كدة. ..
فضلت متنحة في العبوة الپلاستكية الضخمة دي اللي نصها بدون مبالغة اتهدر علي الأرض.. فيها خبطة في ناحية مش متأكدة هي السبب و لا لا .. او يمكن فيه شرخ في مكان انا مش شايفاه..المهم ان النتيجة واحدة ..ان مهمتها انتهيت فجأة.. مع ان لسه فيها نعمة..
حاسب علي حياتك.. حاسب رسالتك تخلص بدون انذار.. حاسب علي النعم اللي انت مخلوق بيها ما تلحقش تستمتع بيها و تروح هدر في الارض من غير ما تحس ..
عندك نعم بتقفيلة الخالق.. هو ماليك علي الآخر ومديلك مُهلة و مُهمة تنجزها.. اوعي حياتك تتخبط منك او تتشرخ … اوعي حاجة تغيرلك المسار اللي المفروض تمضي فيه حتي آخر قطرة.
احنا مش حاسين ولا عارفين نستخدم كل الوزنات اللي ربنا مديهلنا.. هيجي وقت هتتفصل الكهرباء عنك ..وهتلاقي حياتك وقفت حتي لو لسه في حاجات كتير تتعمل فيها .. مش هينفع..
هتتسأل علي النعم اللي فضلت عندك و ما استخدمتهاش.. وعلي اللي كانت عندك و استخدمتها غلط او ضاعت منك..
فرصة دلوقتي بص علي حياتك قبل ما الدنيا تغرق ..
#تكفيك_نعمتي