بعد ما ركنت العربية في ملف صغير وبطلتها ..لقيت حد بيخبط لي على سقف العربية كده وبيشاورلي كفاية كفاية .. مافهمتش في ايه !! ماهو انا كفاية اهوه ياعم .. ركنت و شادة الفرامل لزمته ايه الخبط ده كله ! لاقيته بيقول بلغة الاشارات طوبة كبيرة (ماكنتش سامعاه علشان قافلة الازاز- بس فهمت الحركة)
شكرته كده وبقول في سري يعني لو طوبة بالحجم الضخم اللي متخيلاه ده كان زماني حسيت بيها وانا بلف علشان اركن، على الاقل هيكون في احتكاك ولو بسيط بالعَجل القدماني..
نزلت بقى خلاص اشوف اللي ورايا ومن باب الفضول لفيت كده قلت اشوف الراجل بيبعتني ولا ايه !! الحقيقة اتمسمرت مكاني …انا كنت واقفة قوق حفرة بعمق مش اقل من ٢٠-٣٠ سم وبزاوية وجزء كبير منها متغطي بغطاء مش ثابت ..الله اعلم تحتيه ايه كمان …عاملة زي ما يكون في هبوط في الارض !! ولو كنت اتحركت ١سم زيادة كمان كانت وش العربية اتكسرت من تحت ..
انا الصراحة مش عارفة ركنت ازاي ..وازاي العجلتين اللي قدام لفوا حوالين الحفرة دي وما غرزتش فيها !!
ساعات كتيرة ربنا بيبعت لنا اشارات كتيرة .. حد يخبط لنا يقولنا خد بالك …انت ماشي بثقة قوي بس مش شايف تحت رجليك ..انت مش شايف اللي غيرك شايفه..
انت جوا مشكلتك او قوقعتك عامل زي اللي جوا الصندوق رؤيتك وتفكيرك محدود .
مش لازم كبريائنا يخلينا ما نسمعش مجرد السمع حتى لنصايح اللي حوالينا..نلتفت ليهم علي الاقل ..اينعم انا فهمت انها طوبة مش حفرة كبيرة ما جمعتش صح ..
و صحيح في موقفي ده كمان الراجل جه بعد ما كنت ركنت وبطلت العربية بس ما انكرش اني عمري ما كنت هلف اشوف في ايه الناحية التانية من غير تحذيره الحاد ده ..
وكنت اول ما هدور العربية تاني كنت اكيد اكيد هقع في حفرة..
حاول تلقت الاشارات ..طوبة، حفرة ..كله خطر..ما تستهونش بالناس اللي حواليك …ممكن حد ما تعرفوش خالص ينقذك بكلمة او حتي من غير ما يتكلم .. يغير لك خطة خروجك ..ترجع بظهرك ما تتهورش اكتر ..
ممكن كلمة واحدة تكون سبب خلاصك
“لا يدع رجلك تزل.لا ينعس حافظك. الرب يحفظ دخولك و خروجك ”
#تكفيك_نعمتي