كنت قاعدة افكر في كَم الايات اللي بتتكلم عن يمين ربنا ..
جزء منها وعود من ربنا و جزء مناجاة له …
كلها بتتكلم عن اليمين اللي هو غالبًا تفسيره القوة …(لقيت فوق ال ١٥ اية)
بس انا بقي طماعة وساعات بقعد امسك في الكلمة زي العيال الصغيرة..وكان عندي فضول برضه
قعدت ادور علي اي حاجة افهم ليه كل الآيات بتتكلم عن الجزء اليمين بس!…
قلت له انا عارفة اكيد يارب ان ايدك قوية و مش هتسبني اقع …واكيد اكيد يمنيك كفاية ..بس انا عايزة تمسك إيدي بإيديك الاتنين
طيب يا رب ممكن اعرف الإيد الشمال سيباني ليه !!!!
لحد مالقيت الآية دي من يومين!!!
والنهارده الصبح كمان اتبعتت لي تاني..علشان اركز ان ربنا بيرد عليا ..
هو مش ماسك اصلاً ايدي
ربنا شايلني زي البيبي ..الآية بتقول ..
” شِمَالُهُ تَحْتَ رَأْسِي وَيَمِينُهُ تُعَانِقُنِي”
والحقيقة الشيلة دي تدل ان لاحول لي ولا قوة..ما ينفعش اعمل حاجة من غيره…زي المولود اللي متكل علي امه او ابوه.
تدل اني حتي اصغر كتير من اني اكون بمشي ويمسك ايدي …
تدل كمان اني بنته المدللة..اللي متشالة علي طول!
ماجليش ولا الآية اللي قبليها ولا اللي بعديها …جالي بس الرد..وابهرني ومش عايزة المس الارض ولااشيل هم حاجة..عايزة افضل علي طول متشالة
#تكفيك_نعمتي