العربية محتاجة زيت يا مدام🚗 سخنت مني العربية-كالعادة- فقررت ادلع نفسي و ادخل بنزينة كنوع من التغيير بدل ما ازود انا الماية🚰
الراجل كان هايل 😃اولاً قالي العربية مكبوسة هواء !! طبعًا طبعًا طبعًا انا اول مرة اسمع المصطلح ده !!
كان عندي فضول رهيب افهم ! قالي انزلي هنا علشان تفهمي😂وشرح لي ان من كتر ما العربية بتسخن بتجمع بخار والبخار ده مكبوس في القربة فهي علي طول بتسخن ..🔥بصرف النظر عن صحة المعلومة ..قرر يكشف علي الزيت بالمرة ..وطبعًا طبعًا طبعًا ..انا ناسية الموضوع ده خالص ..فهو بقي في دي وما قدرش يمسك اعصابه 😬
انا شرحتله اني عايزة نوع زيت مُعين وده طبعًا مش عنده لاني كنت في بنزينة منافسة للمنتج 😃
وركبت العربية لقيت الراجل دخل بنص جسمه من الشباك اللي جنبي و خبط لي علي الازاز اللي قدامي
-تطلعي من هنا وتروحي تحطي زيت ..سمعاني؟
-حاضر
-بقولك ما تروحيش ولا حتة من هنا علي البنزينة تحطي زيت ..العربية محتاجة زيت يا مدام!!
انا طبعًا جاتلي هيسترية ضحك و بقول في سري اعصابك يا حج ! انت لو ابويا مش هتخاف عليا كده 😇😃
كمل تخبيط علي الازاز ..”ربنا يحميكي و يحافظ عليكي ..زيت علي طول”..ماشي ..
زيت..زيت
واداني سيل دعوات ..😃
بصراحة ده كان احسن حاجة حصلت لي النهارده ..
طول السكة بفكر في طريقته وصوته ..وان ممكن قوي اكون انا العربية اللي مضغوطة هواء وقربت انفجر ..وانا اللي قنديلي ناقص زيت ..
والراجل ده مش اكتر من ملاكي الحارس اللي بيقولي لازم زيت ..زيت..مش هتمشي من غير زيت ….
..انا واثقة ان قنديلي ناقص زيت ومافيهوش ولا نقطة ..
الواحد محتاج يفضي الهواء اللي في تفكيره اللي ضغطه كمان..
دول اهم حاجتيين يخلوك تعطل ..ويطفوا قنديلك وروحك
مخك مشغول بهواء وهيافات الدنيا ..وروحك مش متغذية كفاية بالصلاة والكلام مع ربنا ..
يبقي علي رأيه لازم زيت..زيت..زيت يا مدام !!
#تكفيك_نعمتي