حلو قوي صوت ربنا اللي بيجيلك عن طريق حد ما تعرفوش خااالص ..شخص أول مرة تشوفه وممكن تشوفه تاني صدفة بعد عمر طويل او قصير و جايز لا برضه -الله اعلم- بس يقول كلمتين تلاتة كده في النص تعرف إنها رسالة مخصوص علشانك .
لما تجيلك رسالة كدة ما تعديهاش مرور الكرام .. افتحها و اقراها عشرين مرة ..عِيد الكلام جواك كتير ..مش كل يوم الواحد هتجيله حاجة حلوة قوي كده ..
انهارده ربنا كلمني.. في توقيت غريب هو لوحده عارف كنت بفكر في إيه !! ده حتى انا نفسي ما كنتش عارفة إني في عقلي الباطن في حوارات كده ..مكنتش مدركة اني مشتته كده.
ربنا كلمني بصوت أول مرة أسمعه..شجعني..وقالي “كملي”.
انا عجبتني الطريقة دي يا رب وكل يوم بتبهرني انك تعرف عني اللي أنا ما اعرفوش ..
حسيت إن كل أفكاري مكشوفة قدامه ..افتكرت ولادي لما بيكونوا واقفين قدامي و مش عارفين يعبروا .. وبكون عارفة هما عايزين إيه من عينيهم ..بيكونوا فضيحة كده ومفقوسين قوي ..غالبًا احنا كلنا كده قدامه ومن غير ما عنينا تيجي في عينيه!
#تكفيك_نعمتي