قررت من فترة كده اجرب اخلل زيتون .. قعدت حوالي اسبوع بخلل في ٩ كيلو زيتون!
الموضوع طلع مُعقد جدًا وفيه خطوات كتيرة تتعمل قبل عملية التخليل نفسها .. غسل الزيتون، تغيير مياه كل يوم .. عمل فتحات و قطع مخصوص علشان الخلطة بقى تدخل جوا الزيتون .. بعديها بقى حطيت حاجات كتيرة قوي على بعض: زيتون (اساسي).. ليمون..جزر .. كرفس .. حبة البركة و كذا حاجة بس ده اللي فاكراه ..او اللي شايفاه بمعنى ادق من البرطمان..
اللي مش شايفاه بس متأكدة انه موجود هو الخل والملح ..
بقالي شهور باكل من الزيتون ده … رغم ان كل الكمية اتخللت في وقت واحد الا ان كل برطمان افتحه الاقي طعمه غير اللي قبله.. بيكون احلى، او يمكن علشان استوى اكتر..
النهاردة بفتح برطمان من اللي فاضلين لاقيته باظ علشان ماكنش مقفول كويس.. اول واحدالاقيه يطلع كده .. سحبت برطمان غيره حسيت الزيتون جواه زحمة .. شبه الناس قوي، البني ادمين اللي عايمين في الدنيا … واللي هيجلهم وقت هيتفتح فيه البرطمان عليهم و تأتي ساعة تقييم حياتهم بعد ما اتحولوا من زيتون خام مُر وعامل زي الزلط الى زيتون مخلل طعمه حلو وطري ..
ما تقارنش التجارب اللي بتعدي فيها بتجارب غيرك .. ممكن تكونوا في نفس الظروف -ممكن حتي في بيت واحد- بس كل واحد يتأثر بضيقات غير اللي جنبه.. فيه نكهات بتدخل علي حياتك تغيير شخصيتك او طبعك .. زي ما مش شرط علشان ان الجزر و الليمون والزيتون في برطمان واحد وخضعوا لنفس الظروف انهم يطلعوا نفس الطعم !!!
يمكن في حياتك خل و ملح ما حدش شايفهم – ولا حتي انت.. بس هو ده اللي مخليك “انت”.. ومديلك طعم !
ما تتذمرش علي البرطمان اللي انت فيه..(بلدك – شغلك – مدرستك – بيتك.. اي مكان) انت في المكان الصح ! ساعات بتقول ياريتني كنت في مكان تاني بس صدقني ممكن البرطمان اللي نفسك تروحه يبوظ ويطلع مالكش طعم في الآخر او تطلع ُمر..
كن متأكد ان اي مرحلة بتعدي فيها بتكون مهمة قوي .. كل خطوة في حياتك ليها هدف حتى لو هتتقطع ..
كل تجربة هتضيف ليك حاجة حتي لوكانت شطة !
يارب انا موافقة وراضية علي كل حاجة في حياتي حتي لوحاجات او ظروف صعبة، انا متأكدة انك اله صالح .. اقبلني بعد ما اكون وصلت للمرحلة اللي ترضيك… حتي لو هاخد وقت .. من فضلك ما تفتحش البرطمان بتاعي غير لما اكون صالحة في نظرك.. وليا طعم.
#تكفيك_نعمتي