ليه ساعات كتير بننسى إن احنا طينة ربنا بيشكلها؟ زي الفخاري لما يمسك طينة و يعمل بيها أشكال مختلفة.. ويشيل حبة على جنب ويستخدم اللي يستخدمه؛ يعيد تشكيله في أي وقت لو شايفه لسة محتاج شغل.. ناس عايزاها ملونة وزاهية بس ممكن تكون هشة جدًا تتكسر في ثانية.. نفس الطينة يشكلها إناء كبير يمكن الناس تستخدمه ترمي فيها النفايات.. شكلها وحش من برة، بس تشوفها تتكسف من نفسك الملونة دي، و تفكر إن دي ليها فايدة كبيرة تخللي المكان اللي حوليها كله نظيف وفلة كده.. إحنا شايفنها سلة مهملات بس هو ليه حكمة في الإناء ده. ناس مزخرفة بدقة رهيبة.. الواحد يسرح في حلاوتها بالساعات.. حتى لو مش ملونة أخدت شغل معمول بمحبة و دقة !
كتير جدًا بتذمر وأقول ليه يا رب أخدت فلان عندك؟ ده لسه صغير و عنده ولاد صغيرين… ليه يا رب فلان عيان قوي وحيموت؟ التجربة دي قاسية عليه.. ليه يارب خلقت ناس مش سليمة أو ناس منحرفة أو ..أو ..أو ..؟ دول مالهومش لازمة.. وآخرتهم معروفة! شاغلة نفسي قوي بالأواني التانية ومش شايفة أنا مشكلني ازاي.. ملوني و لا سايبني بلون المادة الخام؟
بيرجع يرممني بعد ما باتكسر ولا سايبني مكسورة ؟ حيستخدمني في إيه ؟
إوعى يوم تفكر في أبدية غيرك.. أكيد لو أب أو أم، بتربي ولادك هتخاف علي أبديتهم، ده جزء من فايدتك كإناء.. بس إوعى تنسى نفسك.. إوعى تفتكر إنه عمل أواني ملهاش لازمة.. يمكن الإناء اللي انت قرفان من شكله أو سلوكه يكون ربنا عمله كده مخصوص لخلاص نفوس تانية.. ويمكن وجوده مفيد أكتر منك كمان ..إوعى تتذمر و تشتكي.. يمكن لما يسترجع إناء عنده يكون أخده في الوقت المناسب قبل ما يفسد أو يتشوه ..
اعرف إنه ظابط الكل وإنت طينة من عمل إيديه.. فكر تسعده ازاي بوجودك ..
#تكفيك_نعمتي