الشعب المصري…مهموم بالأحداث…أو غافل عنها…لكنه الشارع المصري
*بقالنا أكثر من 45يوما بنهاتي قدام مجلس الشعب وأول ما جاءت زيارة مهمة لمجلس الشعب قالو لنا إمشوا وفضوا الاعتصام ونوعدكم بحل مشاكلكم.
عامل في شركة النوبارية
*قلة الفلوس خلت الناس تتصرف أحيانا بهستريا وقلة عقل زي الراجل إللي قطع عضوه الذكري في قلب الشارع بسبب ضائقة ماليةهم يضحك وهم يبكي.
صاحب محل بقالة
*في المدن الجديدة فاتورة الكهرباء مفصولة عن فاتورة القمامة إشمعنا عندنا هو دا من ضمن العشوائيات يعني؟!.
مواطن من عزبة النخل بالقاهرة
*مين يعوضنا عن فقد بصرنا…بعد ما المتهمين أخدوا براءة.
مواطن من إسكندرية
**تعليقا علي براءة الأطباء المتهمين بإصابة مواطنين بالعمي!!!.
*هنفضل نعتصم ونعتصم لحد ما يرجعولنا حقنا…كفاية إنهم ضربونا وفضوا اعتصامنا من قدام مجلس الشعب.
عامل من شركة أمنسيتو
*نقدر نلف وسط البلد كلها في أقل من 1/2 ساعة لكن مع الزحمة الرهيبة وصفين العربيات علي كل رصيف والإشارات بناخد ساعات.
سائق تاكسي
*يقطعوا الميه عننا وعن أراضينا والزراعة تقل والديون تزيد لبنك الائتمان الزراعي ويرفعوا علينا قضايا بالهبل وبيوتنا تتخرب!!.
فلاح من الدقهلية
*الامتحانات جاية فوق مستوي قدرات ولادنا ونصها من خارج المنهج ليه تعجيز الطلبة وتعب أعصاب أولياء الأمور علي الفاضي!!.
ولي أمر ابتدائي بالعمرانية
*وبدأت تفاريح الحزب الوطني قبل الانتحانات..كيلو اللحمة وصل عندنا 35 جنيها…ياتري بعد الانتخابات هيستمر السعر ولا…؟!.
مواطن بحي المرج بالقاهرة
*بالذمه ده كلام…في القرن الـ 21 ولسه فيه عوادم سودا طالعة من العربيات بالمنظر ده ويقولوا المحافظة علي البيئة.
سائق ملاكي
*لما بتوع الابتدائية بيصوتوا من الامتحانات أمال إحنا هنعمل إيه؟! إحنا مرعوبين من الوزير الجديد.
طالبة ثانوية عامة