الشارع المصري… مهموم بالأحداث… أو غافل عنها… لكنه الشارع المصري
* عجبني الراجل إللي غني وقالك في يوم عيد العمال بلادي- بلادي بلادي… فين قوتي وقوت ولادي؟!. هو دا كان عيد عمال ولا عيد احتجاجات العمال.
محاسب
* إن جيتو للحق مش بس الطلبة هي إللي عاوزين يدرسوا مادة الأخلاق… دا المجتمع كله من مدرس لأولياء أمور… الدنيا اتغيرت أوي والمستوي بيقل.
موظف علي المعاش
* لماذا تستخدم الحكومة إجراءات تعسفية في الاعتصامات والاحتجاجات وده حق مشروع؟!.
إعلامي
* بصراحة مابقاش عندنا ثقة نرشح حد لمجلس الشعب… كله بقي زي بعضه ومابقاش مجلس الشعب له هيبته ووضعه ومحل ثقة زي الأول.
صاحب مقهي
* في الأفلام والبرامج والصحف لازم نرجع تاني نأكد علي الأخلاق فتبقي حياة معاشة وبعدين تدرس.
مذيعة إذاعة
* قالو اللحمة هترخص لكن مافيش حاجة من دي حصلت وأهو مستنيين الفرج عشان ناكل لحمة.
سيدة من الخصوص
* الطريق الدائري بيفصل بين بيوتنا وأراضينا الزراعية, يعني لازم نعدي عليه كل يوم ولا فيه إشارات ولا علامات تهدئة ولا ولا ولا… وكل يوم حادثة.
مزارع من الفيوم
* بقت أسوأ معاملة دلوقتي هي معاملة المصريين في الدول العربية وحتي لو كان مش كل الدول لكن السيئة بتعم.
شاب عائد من أكثر من دولة عربية
* الطريق إللي ياخد ربع ساعة بالتاكس بقي ياخد ساعة ونص من الزحمة وكل شوية يقولوا فيه صفقة عربيات جديدة نزلت السوق.
سائق تاكسي
* بنشتري سكر تموين من محلات بقالة عادية بسعر 4 جنيه ونص… فين الرقابة عندنا؟.
مواطن من القليوبية
* ريحة العيش أبو شلن لا تطاق وشكل الرغيف… طب يزودوه شلن كمان ويدونا رغيف يتاكل.
موظفة
* اعتصامات كتير واحتجاجات لكن دول في وادي والحكومة في وادي تاني… والحلول قليلة ولا الحكومة هتقول محدش يلوي دراع الحكومة؟!!.
إعلامي