الشعب المصري.. مهموم بالأحداث.. أو غافل عنها.. لكنه الشارع المصري
* الخنازير واتعدمت من السوق واللحمة المستوردة فيها دود والبلدي غالية.. مالقوش غير لحوم الحمير يدبحوها ويشفوها ويبيعوها للناس خللي الشعب ياكل.
جزار
* فيه أحياء كاملة معدومة الوعي, ما تعرفش حاجة عن مقاطعة اللحمة أو انتخابات مجلس الشعب أو .. أو, فين الجمعيات الأهلية للتوعية في الأماكن دي؟!.
محام
* حقيقي الأمن بيتعامل بطريقة متحضرة مع كل الوقفات الاحتجاجية لكن اشمعنا مع بتوع 6 أبريل عملت إللي عملته!!.
إعلامي
* المفروض عيد العمال يبقي اسمه عيد الوقفات الاحتجاجية للعمال.. خلال زمن المنحة يا ريس خلاص بقي شعارنا دلوقتي إلحقنا يا ريس.
عامل في شركة
* بيقولك ممكن نصحي مرة من النوم نلاقي مياه النيل مقطوعة.. طب ما أحنا كل يوم نصحي نلاقي الميه مقطوعة.. إيه الجديد!!.
مواطن من الخصوص بالقليوبية
* هما ليه لغوا المرحلة الثالثة؟!.
طالبة ثانوية عامة
* * تعليقا علي قرار وزير التربية والتعليم بإلغاء المرحلة الثالثة من تنسيق الثانوية العامة.
* إللي عاوز عين من عينه تضيع ولا يطلع بعاهة مستديمة يدخل مستشفي حكومة ويبقي عليه العوض.
موظف
* ماعدش عندنا الثقة في أي حد نرشحه لمجلس الشعب بعد كل إللي سمعناه وشوفناه من أعضاء في مجلس الشعب.
مدرسة موسيقي
* لو كان إللي فاتوا عملوا حاجة يبقي إللي جايين يعملوا.. وقال اسمه برلمان.
صاحب محل بحي شعبي
* طبعا لازم الدولة تحدد حد أدني للأجور فوق الألف جنيه.. شوف الغلاء إللي إحنا فيه والانفتاح علي العالم من النت وغيره والناس إللي عايشة.
موظف قطاع عام
* تعبت من النوم علي الأرصفة بعد ما قعدت 30 سنة في دار رعاية تبع الدولة وخرجوني منها مش معايا غير 224 جنيها.. أروح فين؟!.
شاب