* جميع الأسعار بتخفض عالميا إلا في مصر…طب ليه يعني؟.
##مستخلص جمركي##
* كيلو اللحمة بقي بأربعين جنيه…الله يرحم زمن الجنيه.
##موظف##
* خلاص بعد حريق مجلس الشوري هيبقي فيه مراجعة لكل المباني الحكومية وضمان سلامتها من الحريق!!!..والله أعلم.
##صحفي##
* عندنا إدارة أزمات فعلا…ولكن علي الورق.
##كاتب##
* عمالين ننادي ونهاتي مع نفسنا…لا حد راضي ياخد الزبالة من قدام بيوتنا وكل شهر بندفع الاشتراك.
##سيدة من المرج##
* مصر هي أمي…لكن نيلها الملوث بيحرق لي دمي.
##محررة##
* علي كوبري الجامعة شفت بعيني حوالي 8أطفال شوارع واحد منهم بيوزع عليهم حاجات زي سجاير…فين الرقابة في مكان زي ده؟!
##موظف##
* رغم كل الاعتصامات والهتافات برضو مصممين يمتحنونا ويقللوا قيمتنا وإحنا لا حول لينا ولا قوة.
##مدرس##
* طلبوا مني تبرع للمدرسة عشان يقبلوا بنتي في مدرستهم لأن سنها صغير…طب التبرع هيخلي سنها يزيد وبنتي تكبر فجأة 5شهور؟!
##سيدة من شبرا##
* وياتري بقي حريق مجلس الشوري سببه إيه المرة دي…فعل فاعل؟ مختل عقليا؟ ماس كهربائي؟…؟!
##سائق تاكسي##
* النور كل شوية يقطع وبالتالي الميه بتقطع لأن بيوتنا كلها فيها مواتير ميه…يعني بيقطعوا علينا ميه ونور.
##سيدة من حي شعبي##
* أسعار الخضار نار ومش هنتكلم علي اللحمة والفراخ,دا إحنا لو هناكل خضار بس هانصرف الميزانية كلها في أول 15يوما…إيه الحل بس؟
##ربة منزل##