*المدارس علي الأبواب ورمضان بيدق الباب والأسعار كسرت كل الأبواب ودخلت وحطمتنا هايخلوا إزاي مكان لفرحة رمضان من غلو الأسعار.
شاعر شاب
*مش قالوا ارتفاع الأسعار كان سببه ارتفاع الأسعار عالميا,أهو قرينا في الجرائد إن الأسعار نزلت عالميا,اشمعنا مصر؟!
محاسب
*طبعا أنا بنتي في ثانوية عامة وهانحجز لها مكان للدروس الخصوصية من قبل السنة ما تبدأ يعني مع دخول رمضان,بالله عليكم نتصرف إزاي؟
ربة منزل
*أحلي حاجة أن سعر الذهب عال…عشان نقدر نبيع ذهبنا في الأوقات العصيبة إللي إحنا فيها من الأسعار والمدارس وغيرها.
سيدة من القليوبية
*هو التقدم والنمو الاقتصادي ليه علاقة بالتقدم الرياضي يا سبحان الله…كان أملنا إن مصر تشرفنا في الأوليمبياد بتاع بكين…لكن إحنا غلابة في كل حاجة.
موظف
*لازم تفرض عقوبات علي أي مستشفي عام يطرد المريض بسبب عجزه عن سداد فلوسه؟لأنها تعتبر مجانية.
طبيب
*خناقات وقتل بسبب حاجات تافهة زي الخنافة إللي حصلت علي2 جنيه جبنة وقتل بسبب كيلو أكياس بلاستيك وغيرها,هو ارتفاع الأسعار بيؤدي لانهيار الأخلاق والعصبية إللي شايفينها في الشارع المصري؟ده سؤال منتظرين إجابته من الحكومة.
إخصائية اجتماعية
*كله إلا احتكار الأسمدة…نقدر نصبر علي احتكار الحديد والمباني لكن نقدر نصبر إزاي علي زراعات بيرتفع سعرها وخضار سعره في ارتفاع مستمر وده هايكون مش ذنب التاجر ولا البياع.
مزارع
*كل أزمة بتحصل نتيجتها ممكن تكون كوارث,والحلول بتاخذ وقت طويل جدا زي أزمة دير أبوفانا…الموضوع يا جماعة حله في توحيد دور العبادة بكل جوانبها وأسوارها وما يحيط بيها..خلونا نخلص من الهموم دي بقي.
صحفي
*لو فعلا مضي عصام الحضري لنادي الزمالك…هايبقي الزمالك اتفتح له باب السعد…أرجع يا سد مصر العالي.
مشجع زملكاوي