الشعب المصري.. مهموم بالأحداث.. أو غافل عنها.. لكنه الشارع المصري
* والله العظيم مش وقته.. المدرسين زودوها حبتين.. يستنوا لما حال البلد يتعدل وبعدين من حقهم يطالبوا بحقهم.
موظفة
* البلد عاملة زي المريض المحتاج رعاية عشان يفوق من مرضه مش وقت اعتصامات وكلام فاضي.
مدرب جيم
* عام دراسي كامل بدون مدرسين لحد ما ناخد طلباتنا.
مدرس مضرب من الغربية
* إضرابنا مش هيأثر علي التلامذة.
مدرسة مضربة من الغربية
* إضراب المدرسين هيأثر علي ولادنا, ماهو مدرس مضرب عن العمل يعني مش بيشرح في الفصل والفصول فاضية ومافيش مناهج بتتشرح يعني مافيش تعليم.
ولي أمر إعدادي
* الشرطة محتاجة رعاية عشان تقوم علي رجليها, لأن الشعب محتاج رعاية من الشرطة.. صح ولا غلط!!
موظف علي المعاش
* مدارس عيالنا ما يعلم بيها إلا ربنا.. ولو معانا هانوديهم مدارس خاصة.. طب فين رعاية الدولة للمدارس الحكومية.
ربة منزل من القليوبية
* تذاكر الحج بقت أسعارها أعلي من تذاكر السفر لأمريكا.. استغلال أكتر من اللازم.
موظفة قطاع خاص
* وزارة البترول قالت مافيش أزمة بنزين.. تثبت إن مافيش أزمة وأنا بألف علي محطات قد كده ومافيهاش بنزين.
سائق تاكسي
* مسئول عن دورة مدارس وكل يوم بقف قد كده في الإشارات الصبح وبحرق بنزين وياريت لاقي بنزين أصلا يعني إشارات وبنزين.
سائق سيارة مدارس
* ياريت يطلعوا بيان يطمنوا فيه الناس عن إللي ممكن يحصل بكره.
محاسب
* * تعليقا علي ظهور أخبار باحتمال حدوث زلزال غدا الاثنين 9/26.
* الشعب محتاج يصلي مسيحي ومسلم ويقول يارب ودي البلد لطريق الأمان وكفاية رغي وفتن وعك.
مسن من القاهرة