الشعب المصري… مهموم بالأحداث… أو غافل عنها… لكنه الشارع المصري
* المظاهرات مطلوبة, لكن قطع الطريق ووقف الحال مش مطلوب.
سائق تاكسي
* لما ما يكونش فيه استجابة يبقي الناس من حقها تتظاهر.
عضو في حزب
* وليه دايما الاستجابة بعد الاعتصامات والمظاهرات؟!
محام
* خلاص شبعنا كلام ومؤتمرات وبيانات من مجلس الوزراء والجيش وكل المسئولين… عاوزين فعل.
عضو حركة سياسية في ميدان التحرير
* ولو مافيش استجابة لطلابتنا سنعلن حالة العصيان المدني.
معتصم من ميدان التحرير
* لما خط الغاز انفجر أول مرة ما أمنوش المكان كويس قوي برجال شرطة وجيش وأجهزة حوالين المكان ليه؟!
موظف
* لازم يأمنوا مكان الشاشات عشان محدش يكسر ويدغدغ ويتلغي القرار.
محاسبة
** تعليقا علي قرار المحكمة بتصوير جلسات المحاكمات وعرضها علي شاشات خارج القاعة.
* تغيير قيادات الداخلية مؤشر حلو أوي علي مستقبل الشرطة وعلاقتها بالشعب وأدائها الفترة الجاية.
باحث سياسي
* ليه القرارات بتتأخر… طب ما يقدموا حلول وقرارات بسرعة قبل الشعب ما يفقد حلاوة استقبال القرار والاستعداد ليه.
محاسب
* البلد غرقانة في مشاكلها وإحنا غرقانين في مية الصرف الصحي في الشوارع.
مواطن من الخصوص
* لو طوروا محطات المترو إللي في الأماكن العشوائية والشعبية هايحسسوا الناس بأهميتهم كمواطنين ويعلموهم بقي إزاي يحافظوا عليها من خلال الأمن إللي ينظم المكان.
راكب في مترو الأنفاق
* ربنا يستر من غلو الأسعار الفترة الجاية اللي التجار هاينتهزوا فرصة قرب شهر رمضان ويرفعوا الأسعار بالعبيط.
ربة منزل