* حالة كبت في المجتمع خلت الناس مش طايقة بعضها,والأمر وصل حتي للمدارس والأطفال كمان بيعتصموا!!
أخصائي اجتماعي
* علي فكرة علي قدما فرحنا بموضوع إعانة البطالة أهو نلاقي فلوس علي ماربنا يفرجها,لكن طبعا عاوزين نشتغل ونكسب من عرق جبيننا زي ما بيقولوا؟بس ينفذوا القرارده بسرعة ويكون حقيقي.
شاب
* لما أروح أتقدم لعروسة هاقول لأهلها أنا شاب باخد إعانة بطالة بدل ماخد كلمتين في جنابي من أبوها.
شاب آخر
* ياريت بس الدولة تنفذ القرار ده بسرعة,عشان نقدر نصرف بدل ما نمد إيدينا للحرام,والدولة تشكر علي كده وكتر خيرها.
ثالث
* باخد كل يوم أكثر من 6 برشامات للضغط والسكر وغيرها,أصرف كام كل يوم بعد ما سعر الدواء ارتفع!.
مريض
* بعد قرار الحكم علي المتهمين في تعذيب المواطن نصر بسبع سنين سجن حسينا فعلا إن القضاء في بلدنا نزيه والمتهم يعاقب حتي لو كان مين.
محامي
* لكن ربنا يحفظ نزاهة القضاة والقضاء عشان الأمل ما يتقطعش اللي بقي عند المواطنين في الحصول علي حقوقهم عن طريق القضاء بسبب مشاكلهم اللي بنسمع عنها.
محامية
* كابلات الكهرباء عندنا بتضرب لوحدهها ويقولوا بسبب الرطوبة أو حصل ماس كهربي ,أيا كان السبب لازم يحلوا المشكلة الخطيرة دي,خصوصا إن الكابلات جنب البيوت بالضبط.
مواطن من الخصوص
بالقليوبية
* لو رفعوا الدعم عن السلع الأساسية وإدونا بدالها فلوس ,جوزي هايصرف الفلوس دي علي كيفه,ألاقي فين بقي حق زجاجة زيت ولاكيلو رز غالي من غير دعم؟!!
سيدة من حي شعبي
* لو اللحمة غليت علي العيد ,نقضيها مراجيح أحسن.
موظف