الشعب المصري.. مهموم بالأحداث.. أو غافل عنها.. لكنه الشارع المصري
* زمان لما كانت حادثة قتل تحدث نقول فاكرين الحادثة إللي حصلت في الحتة الفلانية من 4 سنين مثلا.. دلوقتي القتل كل يوم وكل ساعة وكله عادي!!.
صحفي
* وبقت أسباب القتل هايفة جدا أو كأن البشر بيتلككوا والعنف والغل هو سيد الموقف.
صحفي آخر
* بهائم ومواشي بيدوها علف مدسوس فيه حشيش وبانجو.. يعني اللحمة هاتعمل دماغ للشعب!!.
محامي
* كان لازم ينبهونا قبل ما يغرمونا.
صاحب سنترال
* * تعليقا علي قرار منع بيع خطوط المحمول بدون عقد بين الشركة والمشتري.
* بقالنا سنين بنبيع خطوط المحمول من غير عقود, إيه ذنبنا ما عملوش العقد ليه من الأول أو ما سابوناش نبيع إللي عندنا من خطوط, وبعدين يبدأوا في القرار الجديد.
صاحب سنترال آخر
* بصراحة القرار ده جه متأخر. كان لازم كحماية لينا من الأول يبقي فيه أوراق تثبت ملكيتي للخط عشان حوادث السرقة والجرائم إللي بتحصل.
محاسب
* كل سنة وأنت طيبة يا حكومة, وعقبال كل سنة وأنت بتحلي أزمات إنفلونزا الخنازير والطيور والبطالة وحوادث الطرق والعنف والأسعار والمستشفيات الحكومية و….. و….. و…..
مدير في شركة خاصة
* عامل يفقد حياته بسبب التوضيبات والتجهيزات إللي بيعملوها لزيارة وزير الإسكان ومحافظ الجيزة. طب ده رب أسرة وإنسان و….. وللدرجة حياة الإنسان رخيصة.
إعلامي
* وبعد ما خلصنا من التصحيح والنتيجة ظهرت.. عاوزين وزارة التربية والتعليم تهتم من دلوقتي بأماكن التصحيح وتحط نظام للموضوع ده ولا ده مش من حقنا!.
مصحح ثانوية عامة
* كان إيه سبب التعتيم الإعلامي علي ردم مساحات خضرة من حديقة الأورمان؟!.
مدرس زراعة بالقاهرة