عشرات الآراء في الحب
“الحب بيجي مرة واحدة” و “الحب الأخير هو الحب الأول” و “الحب أصلا وهم ” و “مافيش حاجة اسمها حب ”
الكل جواه عارف الحقيقة…!!
الحب بييجي مرة واحدة ؟؟!
اه … الحب اللي بيخليك تتكفي على وشك … الحب اللي من غير أسباب … الحب اللي بيخليك تكسر كل قوانينك
و “تتنازل” و أنت مش حاسس أصلا أنك بتتنازل ….
الحب اللي بيخلي بنت السلطان تحب ابن الجنايني…
والأمير يحب البنت البسيطة …. الحب اللي لحد دلوقتي محدش لاقيله تفسير و لا سبب ولا حكمة غير إن بعد الحب ده ما بيروح و بتمر بكل أعراض انسحابه اللي العلم أثبت أنها نفس أعراض انسحاب المدمن من المخدرات بنفس التفاعلات اللي بتحصل في المخ و الجسم … بعد ما بتمر بمرحلة الوجع الحقيقي اللي بتحس فيها أنك بتموت حرفيا …. بعد كل ده …. بيبقى عندك مناعة غريبة عجيبة … لو بنتكلم عن الحب ده … ده بييجي مرة واحدة …. و حقيقي اللي خاض تجربة زي دي على قد ما دي تقريبا أجمل مشاعر حس بيها في حياته …. حاجة كده زي الحلم ….. على قد ما بعد ما شاف وجعها و كسرتها عمره ما يتمنى يخوض تجربة زي دي تاني …..
ده الحب بتاع “المرة الواحدة” ….. حالة …. بعدها فيه ناس كتير بتقرر أنها تختار ب”عقلها” و تدور على شريك حياة مناسب بالورقة و القلم …. زيجات كتير بتنجح بالطريقة دي …. العقل والمجهود والتفاني والإخلاص لشريك الحياة والعيلة والأولاد … بس القلب مع الحبيب … والخيال للحبيب …. لك أن تتخيل …. “عذاب” ……
فيه ناس بتبقى عاوزة تحب تاني …. تدوق تاني …. تحس تاني …. بتستنى ….. و بتحب …. بتحب تفاصيل …. ضحكة حلوة … دم خفيف …. جدعنة …. ذكاء … طيبة وحنية … اهتمام …. طموح …. جمال وجاذبية جنسية …. خبرة حياة …. حاجات كتير و تفاصيل كتيرة …. أسباب …. بتخلينا نحب اللي قدامنا ونتعلق بيه وندمن وجوده في حياتنا …. ده حب …. بس عمره ما هيكون شبه الحب اللي خلاك تتكفي على وشك وتبقى عامل زي المجانين بتسامح على أي حاجة و كل حاجة و تنسى أنت مين وفين و ليه …..
“الحب وهم” …. عبارة اتكعبلت فيها كتير من ناس كتير …. الحب وهم …… فعلا ؟!!!!!!
الحب عمره ما كان وهم … بس فيه ناس قرروا يصدقوا أنه وهم من كتر الوجع اللي شافوه وسمعوا عنه ….. قرروا أنه “وهم” كنوع من الحماية … نوع من النكران …الهروب ….
الحب هو الحاجة الوحيدة اللي هتحسسك أنك “عايش” ….
بس احنا مختلفين …. احنا البشر مختلفين ….. كل واحد على حسب قدرته و طاقته وحدود عطاؤه و حبه وتمسكه بالحياة وجرأته وثقته في نفسه ….
بس الأكيد إن الحب ده أهم حاجة في الحياة …. وأخطر حاجة في الحياة …… الحب بكل أنواعه وأشكاله وطعمه و تفاصيله و تجاربه ….. أهم حاجة في الحياة ….