بصرف النظر عن البلد اللى انا مغترب فيها . لكن انا هتكلم عن حاجات أعمق .. حاجات بتتغير جوا الانسان اول ما ينزل من باب الطيارة ويحط رجله فى بلد تانية
عارف طعم كوباية الشاى اللى بتشربه في مصر من ايد امك او اختك او زوجتك او عند صديقك او جارك او علي القهوة مع اصحابك .. رغم أنها نفس النوع لكن في الغربة مالهاش طعم . عارف كلمة بحبك من أي شخص .. بتسمعها فى الوطن بتفرح ولو من نفس الشخص قالهالك وانت فى الغربة بتوجع .. عارف طيب حضن قرايبك واصحابك ليك والحنان اللى بتحسه .. دول حاول تاخد منهم كتير اوى فى شنطك وانت مسافر علشان مستحيل تلاقيها فى غربتك … فيه جوا قلب كل انسان طعم لكل حاجة جميلة فى حياته .. لكن وقت مابتكون نفس الحاجة + الغربة = حزن … الغربة يا سادة مش شكاير فلوس ولا بيوت ولا عربيات .. الغريب في اي بلد لو ادفى بفلوس الدنيا كلها هيفضل قلبة بردان .. ولو سكن افخم القصور مش هتساوى دقيقة فى حضن امه او ابوه او اصحابه والجيران .. ولو ركب احسن العربيات هيفضل مش عارف رايح فين … الغريب يا سادة بيحط على الدنيا مليون ملعقة سكر … وبرضك تفضل سادة …
اللي احنا بنعمله لصالح بلدنا مصر في الغربة …
… عايز تعرف قيمة مصر … تغرب عنها يوم …