الإنسان غالبا ما بيعرفش يميز هو واقع في أي نوع من أنواع الحب …. لأن الحب مش نوع ولا اتنين …. الحب تفرعاته و أسبابه كثيرة ….
ممكن تحب إنسان بحكم وجوده اليومي في حياتك و توغله في تفاصيل حياتك و مع الوقت بيتحس أنك بتحب الإنسان ده وإن الاستغناء عن الشخص ده من سابع المستحيلات لأن التعود من أصعب الحاجات اللي ممكن تستغني عنها في حياتك بالذات في الوقت الحالي مع انتشار أمراض الكذب و قلة الثقة والخوف من الآخرين…بتكون ماشي بأسلوب (اللي نعرفه أحسن من اللي ما تعرفوش) .. و ده أغلب الظن ما بيكنش حب حقيقي …
في حب من نوع تاني … ممكن تحب إنسان لمجرد أنه حاطك في حالة دايمة من الشد و الجذب … حالة من المراوغة …. حالة من العذاب اللي ما بينتهيش … حد بيدوقك حلاوة رضاه و بيسمك ببشاعة جحوده …. بيحسسك في لحظة أنك ملك الدنيا دي كلها وأن العالم واقف على سعادتك … و في لحظة التانية .. بيحسسك أنك سد خانة و أنك عادي زي أي حد …. الحالة دي بتخلق جواك حالة من الإصرار أنك تكمل … بس عشان تدوق حلاوة رضاه … و العلاقة كلها بتبقى قايمة على العناد … مش على العاطفة ….
في حالة حب بتتنشأ من الغموض …. طرف بيبقى كل مناه يفك شفرة الإنسان اللي أدامه.. و بيحاول و يحاول .. و كل ما يعرف يوصل لحاجة … بيبقى عنده لذة أنه يفك اللي بعدها … و مع الوقت بتنشأ حالة من النشوة و اللذة في القرب من الكائن الغامض ده …. بنسميها حب … بس دي غالبا بتبقى نوع غريب من العلاقات بيبقى هدفه الخروج عن المألوف و كسر الروتين اليومي … لأن الشخص الغامض على قد ما بيكون متعب .. على قد ما القرب منه فيه لذة و متعة كبيرة (لبعض الناس) ….
في الحب الجنسي … و ده من أقوى أنواع الحب اللي الناس بتستقل بيها … بيكون الرابط الوحيد اللي بين الاتنين أنهم بيشتهوا بعض و بيكفوا بعض جنسيا لأقصى درجة… بس ده حب وهمي .. وفاضي … حب جزئي … ما بيسدش بقيت الخانات ….
في حب النقيض … أنك تميل لشخص مخالف ليك في كل حاجة … أفكارك .. أحلامك … وجهات نظرك … تربيتك … كل حاجة … و بتخلق بنفسك رغبة جواك و تحدي أنك تحاول تغيره لصورة منك مع الوقت … ده حب تعيس … نهايته معروفة ….
في حب سادي .. مش جنسيا … حب سادي في المشاعر … في ناس ما بتحبش الشخص اللي بيعاملها كويس و بانسانية … لا في ناس بتحب تتعامل بشكل سيء و مهين على طول … و بتعيش نفسها حالة وهمية من التعاسة و بتقنع نفسها أنها بتستحمل كل ده عشان هية بتحب الطرف الآخر مش أكتر …ناس بتتلذذ بعيش دور الضحية … ده حب مريض والناس اللي من النوع ده محتاجة جدا لعلاج نفسي عشان تقدر تدخل في علاقة سوية ….
في حب بيخدم الصورة الإجتماعية … بتقابل حد .. شكله كويس … بيتكلم كويس … بيلبس كويس … حد يكون واجهة اجتماعية … فبتبدأ تحب الصورة دي …. بتحب شكلكوا مع بعض في الصور و أدام الناس في أي مكان … بتحس أن الناس كلها بتحسدوا على الصورة اللي انتوا فيها … و أنكوا مع بعض كأنكوا ماشيين على ال red carpet …. في ناس فعلا بتدمن الصورة الإجتماعية دي …. و مبيعرفوش يتخلوا عنها .. حتى لو على حساب سعادتهم الشخصية …….
في حالة حب بتتولد لما بنقابل حد … و بتعجبنا دماغه … بيضحكنا … حد بنعرف نفتح معاه أي موضوع و بنتكلم أدامه فيه براحة نفسية …. حد وجوده مبهج لروحنا …. حد بنتعامل معاه على طبيعتنا لأقصى درجة من غير ما نخاف أنه يطلق علنا أي أحكام خارجية …حد بيحترمنا و بيحترم عقولنا … حد بيسمعلنا و بياخد برأينا…. ده مع الوقت بنحس أننا وقعنا في حبه .. و ده غالبا … بيكون الحب الحقيقي …
ما فيش حاجة اسمها … حبيته من أول نظرة …
ما فيش حاجة اسمها … بحبه … بس مش عارفة ليه … بحبه و خلاص ….
في مثل بيقول ( الأرواح بتتلاقى) … ما قلش الأجسام ….
اللي بيعشق فينا … أرواحنا … الشخص اللي يأسر روحك و يمتعها و يفرحها … هوة ده حبيبك و نصك التاني …. اللي هيمتع روحك … هيمتع جسمك و عقلك و كيانك كله ….
كل الأمثلة اللي فاتت ممكن تتسمى حب … و في ناس بتكمل عمرها كله لحد ما تموت و هية فاكرة نفسها كده عايشة … الناس دي بتظلم نفسها بجد …. و بتعيش عمرها كله خاوية … و محرومة !!!!