* مافيش رد من الحكومة علي ارتفاع أسعار الخضار وبالذات الطماطم… مش ذنبنا بنبيعها غالية.
بائع خضار
* إحنا شايفين الأسعار قبل الثورة زي بعد الثورة وكأن شئا لم يكن!!.
ربة منزل ليسانس حقوق
* الشارع محتاج يفهم الدستور وإزاي ينتخب رئيسه وإزاي يعيش الحياة السياسية.
باحثة
* ماسمعناش عن محاكمة مثيري الفتن والشائعات إللي مررت البلد أيام وليالي.
محاسب
** تعليقا علي إشاعة الاعتداء علي الفتيات غير المحجبات وقطع أذن مواطن قنا وغيرها.
* عاوزين نشوف بعنينا فلوس البلد راجعة زي لما بيحرزوا أسلحة بيعرضوها في التليفزيون… عاوزين نطمن ونشوف.
موظف
* أنا مسلم وبقولها… عاوزين بلدنا مدنية متحضرة ديموقراطية والدين لله والوطن للجميع.
شاب بكالوريوس تجارة
* رحت اسأل علي التقديم لكليات الشرطة لقيت نفس الإجابات إللي كنت باسمعها قبل الثورة… خايفين لا يكون الإعلان إللي هايعملوه لمجموعة محددة زي الأول.
خريج حقوق
* أنا وصاحبي محدش يقدر يفرق مين فينا المسلم ومين المسيحي بنبيع مع بعض وناكل مع بعض ونقسم الرزق الحلال مع بعض, ومش هانسيب حد يفرق بينا.
بائع متجول بوسط القاهرة
* لما حد يعمل جريمة خاصة فتنة طائفية… عاوزين مؤتمرات صحفية من الداخلية تقولنا عملت إيه مع الجناة زي ما حصل في جريمة اختطاف حفيدة السادات.
موظفة
* محتاجين وقت عشان الأحزاب تقف علي رجليها وتبقي في الشارع ومتواصلة مع الناس.
محامية
* دايما يقولوا وفرنا أربع أو خمس أو سبع آلاف فرص عمل عاوزين نشوف واحد من إللي اتوفرلهم فرصة عمل… الشباب لسه عاوز يسافر.
خريج معهد تجاري