الشعب المصري..مهموم بالأحداث..أو غافل عنها
…لكنه الشارع المصري
* كانت البطاقة الورقية بتعيش العمر كله ويادوب تتغير من شخصية لعائلية داه إن اتغيرت..أما الرقمية إيه النواقص إللي فيها علشان تتغير بعد سبع سنين عاوزين نعرف؟!.
موظفة
* البطاقة الرقمية لسة جديدة لحقت تقدم علشان يغيروها!!.
خريج
* أتوبيسات النقل في كل مكان بيبقي اللي واقفين أكثر من إللي قاعدين.وفين الرقابة؟!.
** تعليقا علي حادث المنيا الأسبوع الماضي.
موظف قطاع عام
* إللي بيخرج من بيته دلوقتي عامل زي المسافر حتي لو كان شغله جنب بيته بسبب صعوبة المواصلات والخوف من الحوادث وربنا يسترها علي كل الحبايب.
سيدة مسنة
* الترع المكشوفة جنب الطرق السريعة خطر جسيم ولازم يشوفوا حل لعمل حواجز بين الترع دي والطرق خصوصا خط الصعيد.
محاسب من المنيا
* طول عمري بخاف من الكورة وسيرة الكورة وظلم الكورة لكل أصحابها.
** تعليقا علي هزيمة الأهلي أمام المكسيك
مشجع أهلاوي
* علي فكرة الأهلي هو إللي غلطان,بعد ماكسب هدفين في الشوط الأول ثقته بنفسه زادت عن اللزوم فلعب من غير اهتمام في الشوط الثاني وآدي جزاته..الهزيمة.
مشجع آخر
* إحنا علينا كل تكاليف زراعة الأرض بتاعتنا لحد وصول محصولها للمشتري وعشان كده جيت أشتغل في القاهرة وأبعت فلوس لأسرتي أفضل من الزراعة إللي مش جايبة همها.
مزارع من سوهاج
* طالما المواطن المصري فكر يبيع جزء من جسده,مش بعيد يبيع بلده ومايبقاش فيه انتماء لوطنه بالمرة.
كاتب صحفي
* ما هي باينة زي الشمس..هجرة غير شرعية وبيع أعضاء المواطن المصري مش منتمي حتي لنفسه!!!.
مستخلص جمركي
* لما نواب مجلس الشعب الموقرين يتكلموا بإيديهم وبألفاظ لا تليق..الشعب إللي وثق فيهم وانتخبهم يتكلم إزاي مع بعضه؟!.
موجه بالتربية والتعليم