الشعب المصري.. مهموم بالأحداث.. أو غافل عنها.. لكنه الشارع المصري
* كل أملنا إللي فاضل أن الانتخابات البرلمانية تبقي بالقايمة النسبية, ده أملنا الوحيد.
باحث
* سواء كانت الإجابة نعم أو لا للتعديلات الدستورية, الحياة مش هتقف, المهم محدش يصاب بالإحباط ولازم صوتنا وحضورنا يكون موجود في كل انتخابات.
محاسب
* هو كل مصيبة يبقي لازم فيها مبارك!! يعني إيه مبارك متورط في اغتيال السادات وهو كان قاعد جنبه في المنصة.. مش قوي كده يا خوانا.
مدرس
* مش عاوزين غير مساواتنا بضباط الشرطة في كل حاجة عشان محدش فينا يلجأ لأساليب غير شرعية يحقق بها عائد مادي.
أمين شرطة
* أكيد حد له مصلحة في ضياع وتشويه المعلومات إللي في دور معين في وزارة الداخلية وهو إللي عمل الحريق واستغل فرصة المظاهرات.
أمين شرطة آخر
* بجد مش فاهمين حاجة.. فيه شرطة ولا لأ؟.. المظاهرات في كل مكان ليه عمال علي بطال؟.. هو مين فين وإيه إللي بيحصل؟!!
بائع
* أسعار الخضار بقت نار تاني.. الطماطم وصلت 5 جنيه ومافيش نوع خضار أقل من 3 جنيه ومرتباتنا خصموا منها.. نكلم مين!
موظفة قطاع خاص
* حاسين إن مكاسب الثورة بدأت تختزل لصالح فئات معينة وربنا يستر.
مواطن كان مشاركا في ميدان التحرير
* عاوزين نتأكد أن الانتخابات الجاية ببطاقة الرقم القومي تاني ولا لأ عشان نعمل حسابنا لو بالبطاقة الانتخابية.
موظف
* فيه فئات استغلت نتيجة الاستفتاء في التشفي في إللي قالوا لأ ووضعت الدين في المحك في وقت ثوار التحرير وقفوا يطالبوا بدولة مدنية وديموقراطية.
إعلامي