تعليقا وحدادا علي أحداث الإسكندرية, وبل وكل الشارع المصري
* مالبسناش لبس العيد.. حدادا علي أرواح شهداء إسكندرية.
طالبة جامعية
* اللي خرجوا في الشوارع يتظاهروا في كل مكان.. ده نتيجة مشاحنات وضغط بقاله سنين.
خريج حقوق
* سيبوا الشباب يعبر عن نفسه بشكل سلمي.. عشان يطلعوا طاقة الغضب اللي جواهم.
إعلامي
* مش وسائل الإعلام برضوا هي اللي فجرت قضية وفاء وكاميليا وتم تصدير الكلام ده لجماعات متطرفة بطريق غير مباشر؟ أهو النهاردة الإعلام بيحصد نتيجة عمله المشين ومدان قدام الجميع.
محامية
* لما الإعلان عن ضرب الكنائس بقاله شهرين علي النت, أجهزة الأمن عملت إيه؟ شددت الإجراءات الأمنية أول أسبوعين وبعد كده أدت الأمان.. ياريت التشديد اللي كان ليلة العيد يبقي علي طول.
أمين مخازن
* لو فيه حد معترض علي تدخل الخارج في الأحداث اللي حاصلة.. طب ما بيثبتوش عملي ليه إن الأقباط في مصر مش مضطهدين, وماكنش حادث زي ده حصل.
محاسب
* خلاص أجهزة الأمن أخذت في اعتبارها كل الدواعي الأمنية قدام الكنائس.. ماكانش ده من الأول ليه؟!
مدرسة
* ياخوانا وحدوا بناء الكنائس والمساجد والغوا الدين من المدارس واقفلوا القنوات الدينية.. هاتتحل القضية.
مدرس
* مافيش حاجة هاتطفي نارنا غير معاقبة الجاني, والعدالة والمساواة لكل أطراف المجتمع في القوانين والحياة عموما.
مستخلص جمركي
* لو المتهم في حادث قطر المنيا مختل عقليا.. يبقي الحكومة هتدان تاني لأن محدش بيسلم سلاح لشرطي يحمي بيه المواطنين لشخص مختل عقليا.
طبيب
* من الكشح لنجع حمادي للعمرانية لإسكندرية أو حتي للمنيا يا قلبي احزن واحزن.. خلاص الهوس الديني اجتاح كل الشارع المصري.
باحث اجتماعي