الشارع‏ ‏المصري‏ ‏يقول

‏* ‏النهاردة‏ ‏الدولة‏ ‏حصدت‏ ‏التمييز‏ ‏في‏ ‏عدم‏ ‏توحيد‏ ‏بناء‏ ‏دور‏ ‏العبادة‏,‏وللأسف‏ ‏احنا‏ ‏حصدنا‏ ‏معاها‏ ‏مرارة‏ ‏ووجعة‏ ‏في‏ ‏قلوبنا

مهندس‏ ‏اتصالات

‏————–‏

‏* ‏كان‏ ‏فين‏ ‏الأمن‏ ‏وقت‏ ‏الحادث؟‏!!‏

محامي

‏————-‏

‏* ‏دي‏ ‏مش‏ ‏أول‏ ‏حادثة‏ ‏تحصل‏ ‏قدام‏ ‏كنيسة‏ ‏من‏ ‏كنايس‏ ‏الجمهورية‏..‏يتهيألي‏ ‏الأمن‏ ‏ما‏ ‏اتعظش‏ ‏من‏ ‏أول‏ ‏مرة‏ ‏وأخد‏ ‏احتياطاته‏ ‏الأمنية‏ ‏وأدي‏ ‏الأمان‏ ‏لحد‏ ‏ما‏ ‏حصل‏ ‏اللي‏ ‏حصل‏.‏

موظف

‏———-‏

‏* ‏مش‏ ‏كفاية‏ ‏البطالة‏ ‏والغلا‏ ‏وغيرهم‏ ‏من‏ ‏المشاكل‏ ‏كمان‏ ‏شعورنا‏ ‏بالاضطهاد‏ ‏والتمييز‏..‏نروح‏ ‏فين‏!!‏

سكرتيرة‏ ‏في‏ ‏شركة

خاصة

‏———–‏

‏* ‏يا‏ ‏ناس‏ ‏الحقوا‏ ‏الطبقات‏ ‏اللي‏ ‏الجهل‏ ‏والفقر‏ ‏عمي‏ ‏عينها‏ ‏وخلاها‏ ‏أداة‏ ‏في‏ ‏إيد‏ ‏إبليس‏ ‏اللي‏ ‏هو‏ ‏الإرهاب‏.‏

موظفة

‏———‏

‏* ‏أخذنا‏ ‏الأمر‏ ‏بجدية‏ ‏واتكلمنا‏ ‏مع‏ ‏الطلبة‏ ‏في‏ ‏طابور‏ ‏الصباح‏,‏لكن‏ ‏فيه‏ ‏مدارس‏ ‏بالذات‏ ‏الحكومية‏ ‏ماعندهاش‏ ‏الاهتمام‏ ‏الكافي‏ ‏بأي‏ ‏شيء‏ ‏أصلا‏ ‏في‏ ‏سياستها‏ ‏وياريت‏ ‏فيه‏ ‏طلبة‏ ‏بتحضر‏ ‏في‏ ‏المدرسة‏.‏

مدرس

‏———‏

‏* ‏هانحضر‏ ‏مع‏ ‏إخوتنا‏ ‏القداسات‏ ‏وهنشاركهم‏ ‏الأعياد‏ ‏وده‏ ‏أقل‏ ‏شيء‏ ‏نقدر‏ ‏نرد‏ ‏بيه‏ ‏علي‏ ‏الارهاب‏.‏

شاب‏ ‏ليسانس

آداب

‏——-‏

‏* ‏بنسمع‏ ‏بعض‏ ‏العظات‏ ‏في‏ ‏صلاة‏ ‏الجمعة‏ ‏بتحث‏ ‏علي‏ ‏الفتنة‏… ‏طب‏ ‏ليه؟وفين‏ ‏الرقابة‏ ‏عليهم‏ ‏خصوصا‏ ‏في‏ ‏الأماكن‏ ‏الشعبية‏ ‏والعشوائية‏.‏

فتاة‏ ‏من‏ ‏القليوبية

‏————‏

‏* ‏قضية‏ ‏نجع‏ ‏حمادي‏ ‏اتأجلت‏ ‏ليه‏ ‏كل‏ ‏ده‏ ‏عشان‏ ‏يحوشوهم‏ ‏علي‏ ‏بعض‏ ‏ولا‏ ‏اتعودنا‏ ‏خلاص‏ ‏حتي‏ ‏في‏ ‏أهم‏ ‏القضايا‏ ‏العقاب‏ ‏مايبقاش‏ ‏رادع‏ ‏وسريع‏.‏

صيدلانية

‏———–‏

‏* ‏خلاص‏ ‏حياة‏ ‏البني‏ ‏آدم‏ ‏بقت‏ ‏رخيصة‏ ‏لدرجة‏ ‏بيتجمع‏ ‏بالحتة‏!!‏لو‏ ‏كانوا‏ ‏المجرمين‏ ‏عملوا‏ ‏مده‏ ‏من‏ ‏باب‏ ‏إنهم‏ ‏بيقدموا‏ ‏خدمة‏ ‏لربنا‏..‏بنقولهم‏ ‏ربنا‏ ‏مش‏ ‏محتاجكم‏ ‏تقتلوا‏ ‏لأن‏ ‏الله‏ ‏محبة‏ ‏وسلام‏.‏

مدير‏ ‏مبيعات

‏———‏

‏* ‏ماعندناش‏ ‏كلام‏ ‏نقوله‏ ‏غير‏ ‏الرب‏ ‏يدافع‏ ‏عنكم‏ ‏وأنتم‏ ‏صامتون

صاحب‏ ‏محل‏ ‏بحي‏ ‏شعبي

‏———-‏

‏* ‏كلها‏ ‏قد‏ ‏إيه‏… ‏أسبوعين‏,‏شهر‏,‏شهرين‏ ‏والموضوع‏ ‏هايتنسي‏ ‏وأهو‏ ‏هتبقي‏ ‏ذكري‏ ‏يمكن‏ ‏نصحي‏ ‏بعدها‏ ‏علي‏ ‏حادث‏ ‏جديد‏.‏

طبيب‏ ‏بشري

‏————‏

‏* ‏مستنية‏ ‏إيه‏ ‏يا‏ ‏حكومة‏ ‏عشان‏ ‏تطلعي‏ ‏بقرارات‏ ‏وقوانين‏ ‏جديدة؟‏!‏

محررة