الشعب المصري… مهموم بالأحداث… أو غافل عنها… لكنه الشارع المصري
* مترو الأنفاق بقي حاجة لا تطاق… بقيت بقعد ساعة كاملة في المترو بعد ما كان ثلث ساعة, وده بسبب أعطال عمال علي بطال.
موظفة
* اشتروا خبراء أجانب بملايين عشان سمكة القرش بتاعت شرم الشيخ؟ مش عارفين يجيبوا خبير ولا اثنين عشان أعطال مترو الأنفاق؟!!
راكبة في مترو الأنفاق
* أكثر المحطات تضررا هي كلما اتجهنا ناحية المرج وكان اللي ساكن فيها مش بني آدمين؟ لكن محطات وسط البلد خدمتها 5 نجوم بالنسبة لنا.
راكب من عزبة النخل
* هو صحيح أنبوبة الغاز هتبقي بأربعين جنيه!! يعني ناكل الخضار من غير طبيخ ونحمي العيال مرة كل أسبوعين.
أم لـ 4 أبناء من القليوبية
* ولما يرفعوا الدعم عن أنبوبة الغاز, أصحاب المطاعم هايرفعوا سعر منتجاتهم حتي مطاعم الفول والطعمية.
موظف
* يعني أنبوبة واحدة علي التموين وبعد كده نضرب دماغنا في الحيط, ماكناش عاملين ميزانية لأنبوبة الغاز دلوقتي هانعمل إيه ولا إيه؟!
ربة منزل من القليوبية
* بقينا نلعب لعبة البيضة الأول ولا الفرخة يعني نبدأ بارتفاع سعر اللحمة ولا أنبوبة الغاز ولا السكر ولا… ولا… .
شاعر مبتدئ خريج
* بيمنحوا الطلبة اللي بيشاركوا في مسابقات رياضية درجات مجانا علي المجموع واحنا مابيدوناش ولا درجة… مع إن مسابقاتنا أصعب ومحتاجة مجهود ووقت وتفرغ أحيانا.
مخترع في الثانوية العامة علمي
* مسلسل انهيار المنازل ما بيخلصش… وأسر بتتشرد في عز البرد اللي احنا فيه… تروح فين الناس دي يا حكومة؟!!
إعلامي
* الشقة بقي سعرها زي الأرض وأغلي, وشقق في مناطق زي الزيتون وغيرها سعرها وصل نص مليون, ليه ده كله وفين الدولة من أصحاب العمارات الجديدة اللي رفعوا السعر للخيال ده… كده بيعجزونا.
عريس يبحث عن شقة
* يعني قولنا نقبل شبكة صيني ومش لازم نجيب الجهاز كله… لكن الشقة ينفع نستغني فيها… فيه شقق صيني جاية من الصين نسكن فيها؟!
عروس ليسانس آداب