الشعب المصري…مهموم بالأحداث…أو غافل عنها…لكنه الشارع المصري
* الكتب الخارجية بقت عاملة زي المخدرات… توزيعها في المكتبات يعني جريمة.
ولي أمر ثانوية عامة
* * تعليقا علي حظر بيع الكتب الخارجية بعد التهديد بمقاضاة وزير التعليم للناشرين عند بيع هذه الكتب.
* هو المفروض الكتب دي تتلغي خالص ويتوفر في كتاب الوزارة كل الشرح الوافي لأن كدة يعتبر كتاب الوزارة غير مكتمل وده عيب في حق وزارة التعليم.
مهندسة
* طب وإحنا ذنبنا إيه… إحنا بيوتنا مفتوحة من بيع الكتب الخارجية ومعاها شوية ورق وكراريس… لكن مكسبنا في الكتب الخارجية.
صاحب مكتبة بحي شعبي
* ناس معاها فلوس وتتعالج علي حساب الدولة وياريتها عمليات مهمة إلا كلها تجميل, وناس مش لاقية تعمل حتي عملية اللوز.
عامل في مصنع
* أنتوا لسه فاكرين… مش سعر الدقيق غلي من بدري يعني لازم نصغر حجم المخبوزات هانعمل إيه؟!!.
خباز
* التكسير وأعمال الشغب إللي شوفناها قدام النادي الأهلي ولا كأنها الانتفاضة الفلسطينية… ليه ده كله!.
مشجع أهلاوي
* محدش جايب سيرة خالص عن موضوع إنفلونزا الخنازير عاوزين نطمن بس قبل دخول الشتاء نسأل مين؟!.
موظف وولي أمر
* البطالة والملل خلت جرايم غريبة بتحصل كل يوم وعلي غفلة يعني مالهاش سبب واضح… الدنيا بقت تخوف.
موظف علي المعاش
* كنا بنستمتع الأول بمشاهدة الماتشات… دلوقي بنتسلي بطبقين لب قدام الشتايم والألفاظ والخناقات بين اللعيبة وبعضها ومديري النوادي!!.
صاحب مقهي بلدي
* بقالنا أكثر من 4 أشهر محصل الكهرباء ماجاش وطبعا في انتظار فواتير الكهرباء ومش فاتورة واحدة مضافا عليها فواتير الزبالة محدش بياخد مننا أصلا.
ربة منزل ليسانس آداب
* وأنا صغير قوي كنت بقول: نفسي أبقي ظابط وبعدها بشوية فهمت معني ضرب النار فخفت وقلت: أبقي دكتور لكن لما كبرت لقيت أن الظابط والدكتور لازم أخاف منهم واحد من سلطته والثاني من مشرطه… ودلوقتي أنا حلاق.
صاحب صالون رجالي
* أول حاجة في أجندة أي حزب لازم تكون الدعوة لحرية العقيدة… الاحتقان عمال يزيد ومحدش حاسس بحاجة دلوقتي.
رجل دين