الشعب المصري… مهموم بالأحداث… أو غافل عنها… لكنه الشارع المصري
* لما الكنيسة تحتاج قانون لتوحيد بناء دور العبادة الموضوع يفضل نايم, ولما ماتحتاجش الكنيسة قرارات للزواج وهي أدري باللي بتعمله تطلع لها قرار… ليه!!.
محامي
* حتي لو طلع قرار نتجوز تاني… مين الكاهن إللي هيرضي يغير الشريعة؟ وهل دا هيبقي جواز حلال؟!!
محاسب
* الحكم ده ماهزناش لحظة واحدة لأننا عارفين أصول الشريعة المسيحية كويس إن الله بيعمل الجواز الكنيسة مش المحكمة, وطالما الكنيسة عمرها ماهترضي يبقي القرار كأنه لم يكن.
سيدة من عين شمس بالقاهرة
* يعني أروح أخلي خطيبي يمضي علي ورق إنه مش هيتجوز علي مهما نكدت عليه, ولا أثق بنفسي وبكنيستي وقراراتها وبخطيبي إنه هيخاف ربنا… ومش هيتجوز تاني.
طالبة جامعية
* ولما يصرفوا الأنبوبة علي بطاقة التموين آخدها في شنطة ولا أدحرجها علي الأرض… دا إيه العذاب ده.
عجوز من القليوبية
* طب أنا أسرتي مكونة من 7 أفراد أجيب أنبوبتين علي البطاقة وأوفر من الميزانية 50 جنيها لأنبوبة تالتة وفي الشتاء 100 جنيه… نعمل إيه؟ هي الأسعار ناقصة كمان أنبوبة البوتاجاز.
موظفة
* هانروح فين ونصرف علي بيوتنا إزاي بعد ما يسحبوا الأنابيب مننا ولا مانلاقيش حد يشتريها مننا؟!!.
بائع أنابيب متجول
* طالما فيه حصانة لوكيل النيابة والقاضي… المحامي كمان لازم يكون ليه حصانة هو مش أقل.
محامي
* الناس اتلهت أصلا عن شراء الذهب… هي الأسعار مخلية حد يشتري حاجة.
ربة منزل من الجيزة
* صدق أو لا تصدق الناس بتشرب ميه صرف صحي بدل ميه الشرب… أهو خليهم يتدربوا قبل ما تنقطع المياه خالص عننا.
صحفية