الشعب المصري.. مهموم بالأحداث.. أو غافل عنها.. لكنه الشارع المصري
* إحنا مرعوبين جدا من توطن إنفلونزا الطيور وانتشار إنفلونزا الخنازير مع وجود الزحام وعدم التنظيم ووجود محلات لبيع الطيور الحية في أماكن شعبية كثيرة.. كل ده بيخلي الأمر يسوء أكثر.
سيدة من العباسية
* المفروض يوزعوا الكمامات مجانا طالما ثمنها خمسين قرش لعدم استغلالها في السوق السوداء.
موظفة
* قلقانين نروح أماكن سياحية عشان الاحتكاك بالأجانب بقي عندنا تصور إنهم مصدر العدوي من إنفلونزا الخنازير.
مهندس كمبيوتر
* بكل المقاييس امتحانات السنة دي أرحم من السنة إللي فاتت, لحد النهارده نقدر نقول إنها امتحانات مفهومة نقدر نحلها.
طالب ثالثة ثانوية عامة
* لازم يكثفوا حملات التوعية بإنفلونزا الخنازير علي القنوات الأكثر في المشاهدة زي قنوات الأفلام والمسلسلات بالاتفاق مع وزارة الصحة.
صيدلي
* إزاي يخصصوا لمدرس حجرة في مبني إداري بالمدرسة يدي فيها دروس خصوصية أو إنه يبقي معاه مفتاحها ويدي دروس فيها بشكل ودي.
مدرسة
** تعليقا علي قضية المدرس الذي أقام علاقة جنسية مع 7طالبات ثانوي في أكثر من مكان منها المدرسة.
* مرة واحد عطس في الميكروباص الناس نزلت كلها من العربية, طبعا لأن الناس معندهاش وعي بإنفلونزا الخنازير.
مواطن يعمل في الزمالك
* طب المناطق الشعبية والعشوائية تعمل إيه عند تحول فيروس إنفلونزا الخنازير لوباء؟.
سيدة من حي شعبي
* لقيت نفسي فاضي جوه السجن قلت أذاكر وآخد شهادة الثانوية العامة وأكمل لما أخرج.
مسجون بليمان طرة
* سمعنا إن النادي الأهلي ونادي الزمالك فيهم إنفلونزا خنازير دي أكيد حرب شائعات من مشجعي الناديين.. ربنا يهديهم.
مشجع علي الحياد
*بيقولوا مصل التاملفو بقي يتباع في السوق السوداء وفيه أمصال مضروبة بالذمة ده وقته, الناس بتقول يارب استرها.
صاحب محل