الشعب المصري… مهموم بالأحداث… أو غافل عنها… لكنه الشارع المصري.
* أول مرة نلاقي ضحايا عملية نصب متعاطفين مع المتهم… هل ده نصب من نوع جديد ولا هو فعلا مظلوم!!
محامي
** تعليقا علي اتهام رجل الأعمال نبيل البوشي بالنصب علي مصريين وإماراتيين.
* لما تكون قرية صغيرة تحت جبل لازم يكون فيه وسائل أمان لحمايتهم من وقوع أجزاء من الجبل عليهم… بعد اللي حصل.
عضو مجلس محلي بالمنيا
** تعليقا علي انهيار جزء من الجبل الشرقي بالمنيا ومصرع 3أطفال.
* محدش يلوم المدرس لو شرح للطلبة من غير نفس… ماهو لا مرتبات كويسة وكمان تأخير في دفع المرتبات دي.
مدرس من حلوان
* حتي لو كان أكثر من 80% من محافظتنا زراعة ده خير وبركة وده شغلنا ورزقنا يحرمونا ليه من أرضنا ويحولوها لمناطق صناعية؟!!.
مزارع من كفر محروق بالغربية
* المقطورة أقل خطر من الترلة لأن المقطورة 9متر وبالتالي الفرملة ممكن السواق يتحكم فيها, والترلة 12متر وليها مساوئ كثير.
سائق مقطورة
* يوفرولنا وسيلة نقل بديلة وآمنة ومش هنتكلم.
سائق آخر
* هابيع عربيتي وأشتري مركب عشان أعرف أمشي في الشارع الغرقان ميه.
مواطن من مدينة العبور
* كان لازم نسمع إن عضو مجلس الشعب اللي رفع الجزمة أثناء جلسة مناقشة إتعاقب… وأهو حصل.
محاسب
* بدل ما يركزوا علي السير عكس الاتجاه في شوارع جانبية, يشوفوا الطرق السريعة الصحراوية والزراعية المؤدية للمحافظات اللي فيها حوادث بالهبل… مش شارع جانبي في الهرم ولا المهندسين!!.
سيدة من القاهرة
* لسه بندور علي البنزين 80 ونسمع عن اكتشافات بترول ومش بترول… يا ستي دا كلام والسلام.
سائق تاكسي