* لماذا كل هذه التظاهرات حول حزب العمل في وقت فيه سيل من الأحزاب الجديدة منها ذات الأفكار المتشابهة مع حزب العمل؟!
إعلامي
* سيناء اتحولت لميليشيات وقواعد عسكرية.. فين الجيش؟!
مواطن من العريش
* شركتنا بتصفي العاملين وسمعنا أن فيه مصانع بتصفي العاملين برضو, يعني بعد الثورة البطالة هتزيد مش هاتقل.
عامل في شركة خاصة
* فيه مذيعين طريقتهم مستفزة جدا بيأكدوا بعد الثورة أنهم ضد النظام السابق مش قوي كده عشان أنتوا باينين.
مدرس
* يا عيني عليكي يا بورصة لما بتضيعي منا.
موظف
* انتظرنا زيادة رواتبنا في شهر يوليو ما حصلش!!
موظف قطاع خاص
* فيه برامج فكاهية لكن بتعبر عن مدي جهل قطاع كبير من الشعب بأمور معينة.. يعني سألوا واحد عن زراعة المكرونة قال جميلة, وواحد تاني سألوه معني مفرد فلول قال فلفلة!!
مندوب بشركة خاصة
* نفسنا مصر ترجع زي أيام عبدالناصر.. شوفنا الرئيس وسط الناس عادي والضمير في العمل وعدم حب الامتلاك و…
موظف علي المعاش
* جاتلي حقوق الزقازيق إزاي هنسافر وندرس وسط ظروف البلد.. نعمل إيه؟!
طالبة ثانوية عام أمام مكتب التنسيق
* علي فكرة فيه شغل كتير لكن المرتبات ضعيفة, مش مشكلة إللي عاوز يشتغل هايشتغل مؤقتا أو هايشتغل ويكبر حبة حبة.
مسنة من شبرا
* القمامة في كل حتة, وأحياء كثيرة كانت مثال للنظافة النهاردة شكلها بقي مقزز للعين.
مهندس
* البلد مافيهاش فلوس.. البلد مافيهاش فلوس, طب ما نشغل الإنتاج ونهتم بيه.. هانجيب فلوس.
بكالوريوس تجارة