الشعب المصري.. مهموم بالأحداث.. أو غافل عنها.. لكنه الشارع المصري
* مجموعة الأحكام والإجراءات إللي بتتاخد ضد رجال الأعمال وضباط الشرطة المتهمين في جرايم بتحسسنا إن لسه فيه أمان في البلد.
محامي
* لسه بتتكلم عن الثأر وإحنا في 2009!!.
إعلامي
* لو زودوا برامج التوعية عن إنفلونزا الخنازير.. هنتفادي حدوث أي مفاجآت لا قدر الله.
طبيب
* مالناش ذنب إن الدقيق بيجي بايظ.. إحنا إللي خسرانين في كل الأحوال وفيه ناس بترجع العيش.
فران
* باشوف بعيني شولة أجولة الدقيق وهي بتتسرب وتتباع بالليل للناس من الفرق إللي قدامنا.
سيدة من القليوبية
* رغم تحديد السرعات علي الطريق الدائري لكن العربيات بتمشي بجنون.
سائق نقل
* عاوزين نفهم الحروف إللي بدأوا يحطوها علي العربيات معناها إيه.. و3 أرقام ليه؟. يعني فهمونا النمرة الجديدة للعربية.
محاسبة
* لما الدولة بتوقف حملات التوعية عن أي حاجة أمراض أو مخالفات أو غيرها الناس بترجع تاني.
موظف.
* أنا مش قادر أصدق كمية الحوادث إللي بتحصل وبقراها كل يوم في 3 جرايد غير إللي مش بقراها.
صاحب مقهي
* اللهم إكفينا شر الدخول لمستشفي حكومي.
عامل في مصنع
* صدوقني لو المناهج اتقللت شوية من الحشو.. الطلبة هتفهم وهتحفظ دروسها ومش هتحتاج تغش.
مدرس
* ادعو لي أنجح وأجيب مجموع! دخلت امتحان الكادر الخاص وشكلي هيبقي وحش لو سقطت بعد تدريس 25 سنة.
مدرسة
——————-
كلام والسلام
لو قابلت أوباما هتقوله أيه؟
في غضون أربعة أيام سيصل الرئيس الأمريكي باراك أوباما إلي مصر, فبالطبع كل واحد منا يريد أن يتحدث معه أو يوصل له رسالة أو رأي أو…. أو….
تتخيل لو أنت أمام أوباما ماذا ستقول له؟.. هذه بعض الآراء, قد يكون البعض منها صحيح والبعض ساخر لكن لعل الرسالة تصل يوما ما ليس فقط لأوباما لكن للمسئولين في بلادنا.. وأهو كلام والسلام.
* يا سيادة الرئيس الأمريكي بلاش تمييز في التعامل بين الدول.
صحفي
* لو قلت لك علي مشاكلنا هتعمل حاجة؟!.
سكرتيرة
* عاوزين حل قاطع للأزمة الاقتصادية العالمية.
صاحبة محل
* شوف خط الفقر واصل لحد فين في غالبية الدول.
محرر اقتصادي
* كلامك منمق وجميل, ياريت يبقي عملي يا أوباما.
مهندسة
* مشاكل الشرق الأوسط هتتحل بداية من مصر.
صحفي
* حتي لو اختلفت معانا, هنقولك أهلا بيك في بيتنا.
صراف
* لو قعدتك هتطول في رئاسة أمريكا يبقي أهلا بيك في بلدنا.
كاتب ساخر
* عاوزين حل نهائي للقضية الفلسطينية.
محاسب في شركة خاصة
* هتعملوا أيه مع إيران والأزمة النووية؟.
موظف
* بدايتكم كويسة وحماسية ياريت تستمر حتي النهاية.
خريج علوم سياسية
* هتعلموا أيه للقضاء علي وباء إنفلونزا الخنازير علي مستوي العالم؟.
طبيب
——————
نفسي بلدي تعبرني
** لما بيمدحوه بيقولوله يا واد يا فنان عشان الكادر أي اللقطة بتاعته مضبوطة والصورة نقية والمونتاج إللي بيعمله للشريط المصور بيعمل فيه عمايل..
لكن لما يذموه يقولوله أنت مصور ولا بتشيل الكاميرا للبيع.
فادي إبراهيم مصور فيديو وفوتوغراف 25 سنة.. يحمل الكاميرا علي كتفه ومعها أفكار في ذهنه ربما تكون بذرة إبداعات لشاب في مقتبل عمره تجعله يوما صاحب رصيد من الأعمال الجيدة أو مجرد مصور.. له طموحاته وآراؤه وهمومه ربما لا يري سوي كادراته بما فيها من صور إيجابية أو سلبية وربما يري المجتمع كما يراه البعض.. المهم أنه واحد من الشارع المصري يتحدث ومن حقه أن يقول……
* شغلتي معناها إني أرزقي يعني علي باب الله يوم أعمل 50 جنيه ويوم ما اعملش خالص.
* طبعا دخلت مجال التصوير كمحبة وهواية ونفسي أبقي مخرج حتي لو بدايتي مصور أفراح وحفلات.. بس فين الفرص في بلدنا!!.
* اشتغلت من ميكانيكي وبياع شنط وسباك لكهربائي يعني أنا سبع صنايع والبخت ضايع.
* علي فكرة أنا متجوز ومعايا طفل عمره شهور ونفسي أربيه وأعلمه وأشوفه أحسن شاب غير نشأتي أنا تماما.
* إحنا كشباب مكبوتين ومعظم أصحابي زيي كل إللي يهمهم الغلاء وقلة الفلوس عشان نعيش عيشة مرتاحة خصوصا المتجوز مننا.
* بحلم أشتري كاميرا ويبقي عندي شغلي الخاص لكن زي ما بقولك الغلاء مخلاش حيلتنا حاجة.
* ماليش غواية خالص بالسياسة ولا أحب أعرف عنها حاجة.
* آه أعرف أحمد نظيف هو ماسك حاجة في الوزارة!!.
* أنا ممكن أقرأ جورنال قديم لأن ممكن مايبقاش معايا حق جورنال جديد.
* باشجع الأهلي عشان فريق قوي وأهو جاب لنا الدوري.
* ماحبش أسافر.. أحب أعيش في بلدي المهم بلدي تعبرني.
* طموحي أبقي مخرج كبير والدنيا تدي شوية عشان أحلامنا تكبر ونقدر نحققها.
* يا رايس الشباب الأساسي في أي بلد قولهم يهتموا بينا شوية ويتبنوا أفكارنا وبلدنا تبقي زي الفل.