الشعب المصري.. مهموم بالأحداث.. أو غافل عنها.. لكنه الشارع المصري
* آدي أول حالة وفاة من إنفلونزا الخنازير دا غير إنفلونزا الطيور وربنا يستر من إللي جاي.
صاحب ستوديو بالقليوبية
* إنفلونزا خنازير علي طيور علي تيفود علي طاعون… هي بلدنا هتلاحق علي إيه ولا إيه وبعدين فين دور وزارة الصحة والبيئة وكل الوزارات؟!.
صيدلي
* التنسيق الإلكتروني إدانا فرصة نعدل رغباتنا براحتنا من غير ورق يتقطع أو شكله يتبهدل من الاستخدام.
طالب ثانوية عامة
* حليت مادة الإنجليزي كويس وجبت درجة قليلة,أنا متأكد أن المصححين كان عليهم ضغط فكل واحد بيصحح 70ظرف كل ظرف فيه 50ورقة إجابة.
طالب متظلم
* بيقولوا المحافظة ما بتتكلمش في قضايا البلاعات… يا سلام!!!
إعلامي
* * تعليقا علي سقوط3أفراد في بلاعة بكفر الشيخ الأسبوع الماضي
* يا إما يطبقوا علينا لوائح القطاع العام أو القطاع الخاص مش في المكافآت نبقي قطاع عام والجزاءات نبقي قطاع خاص!!.
موظف بهيئة البريد
* المسافة بينا وبين أمريكا مش 40سنة بس في الوصول للقمر لكن دي 400سنة ولسة بتوع الأبحاث العلمية في بلدنا بيجروا ورا حافز زيادة في رواتبهم!!.
مذيعة
* صراحة النادي الأهلي عنده حق يرفض رجوع عصام الحضري ومبروك عليك الإسماعيلي يا حضري.
محاسب
* بالبساطة دي ينفذوا حكم في يوم وليلة من غير ما يخطرونا قبلها وإحنا 160عامل إحنا ذنبنا إيه؟!.
عامل في فندق بالمعادي
* * تعليقا علي صدور حكم بضم فندق بالمعادي لأكاديمية السادات
* شوف بلدنا فيها أمراض ومشاكل قد إيه ولسة فيه ناس بتتظاهر عشان بناء دور عبادة أو احتجاجا علي بناء دور عبادة…كفاية بقي.
كاتب صحفي
* لما سعر العلف انخفض عالميا,سعر اللحمة مانزلش ليه؟… ليه؟!!.
مواطن أمام محل جزارة