الجدر المصري: “هل”, من مرحلة الكتابة بالحرف الهيروجليفي!
معناه = ظهر/ لاح من بعيد/ جي م السما!
بمخصصين واضحين: نجمة وسما, وزاي ما احنا عارفين المخصص هوه اللي بيوضح معنا الكلمة, فـ الكتابة المصرية القديمة!
رغم كده الخواجة بيعمل قاموس وهوه قاعد فـ لندن, بقا مش عارف الكلمة دي يعتبرها إيه؟ أداة وصل ولا فعل ولا إسم ولا صفة, ريح دماغه وقال مش عارف وخلاص!
المصري أحمد باشا كمال فـ قاموسه, بحث نفس الكلمة, وقال إن معناها = الظهور من بعيد, ومنها: أهل يهل هلال!
معنا الكلام ده إيه؟
معناه, إن الخواجات عملو مجهود كبير فـ علوم المصريات, بإعتباره علم, أو بإعتباره وظيفة, وكمان بإعتباره مصدر للثروة من سمسرة وتجارة الآثار .. لخ!
يعني بمنتها الصراحة والوضوح, الخواجات ما اهتموش بمصر عشان سواد عيون مصر, ولا عشان مغرمين صبابة, المسألة كانت كلها مصالح شخصية وسياسية!
ويبقا اللي يشيل هم مصر, هويتها وثقافتها وقوميتها, لازم يكون مصري!
الكلمة دي مجرد مثال بس, وفيه ميت وألف دليل, إن المصري هوه الوحيد اللي يقدر يعمل الوصلة بين كل مراحل الحضارة المصرية, عشان يبقا فيه خط بياني واضح نعرف بيه إتجاهنا ومستقبل أجيالنا!
الحضارة يعني الإلتزام والمسئولية والإهتمام بأدق التفاصيل, شرحناها فـ بوست سابق, وحياة المصري من تحليل آثار اللغة, بتقول إنه كان مهتم بالتفاصيل, لدرجة إن كل حاجة يبقا لها رمز مقدس “نتر”, وده سر تعدد الرموز المقدسة, مش حكاية تعدد آلهة ولا وثنية, زاي ما بيردد أعداءنا!
شوف انواع الأطباق المصرية القديمة, تلاقي عشرين تلاتين نوع وشكل, وكل طبق له إسم!
شوف أنواع الكبايات المصرية القديمة, تلاقي عشرين تلاتين نوع وشكل, وكل كباية لها إسم!
شوف انواع الكراسي المصرية القديمة, تلاقي عشرين تلاتين نوع وشكل, وكل كرسي له إسم!
شوف أنواع الأكل والشرب واللبس وأدوات البيت وأدوات الشغل, هتلاقي عشرات وميات من كل نوع وشكل, وبارضو كل حاجة لها وظيفة وإسم وصوت!
شبكة نجوم السما اللي كانت ظاهرة بالعين المجردة, كل نجم له إسم, وكل مجموعة وكل مجرة, لها إسم ووصف!
شهور السنة, كل شهر له إسم!
كمان أيام الشهر, مش واحد اتنين تلاتة وخلاص, لأ كل يوم له إسم!
أيون, كل يوم من أيام الشهر له إسم, وتقدر تقراهم او تراجعهم من الصورة!
حضارة المصريين, هيه حضارة الإلتزام والمسئولية والإهتمام بأدق التفاصيل, وإلا مكنوش يقدرو يبنو أهرامات ولا مسلات ولا سابو لنا ثروة علمية وأدبية وفلسفية مكتوبة ع الجداريات والبريات!
نترحم علا جدودنا, بإننا نمشي فـ طريقهم, طريق المجد, طريق الحضارة, بالإلتزام والمسئولية والإهتمام بأدق التفاصيل!
هل هلالك .. شهر مبارك .. كل سنة ومصر الحضارة بخير!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.