من أجمل الأخبار: افتتاح أكبر وأحدث مصنع نسيچ ف الشرق الأوسط!
بالتأكيد ده خبر سعيد ممكن يرجع مصر لمكانتها وريادتها ف مجال صناعة النسيج!
انما الأسعدني أوي، إسم المصنع الجديد: نيت!
نيت ربة النسيج, وراعية النساجين ف مصر القديمة!
يعني ان كانت الزراعة بدأت ف مصر واللي بدعها النتر أوزير، فالنسيج بارضو بدأ ف مصر واللي بدعه النترة: “نيت/ نيث”!
مارتن برنال ف كتابه “أثينا السوداء” بيقول ان اسم اليونانية أثينا متصرف (باللخفنة) من إسم الربة المصرية: نيت/ نيث!
بدأ النسيج ف مصر القديمة بأنوال بسيطة عبارة عن مستطيل خشب متقسم بفتحات بيمر منها الخيط, كانت الكاهنات بتوزعه ع البنات والستات وتدربهم عشان يحولو غزل الخيط لقماش منسوج لهدومهم وفرش بيوتهم!
كان النسيج المصري عجيبة عجايب العالم، ف وقت كان باقي البشر بيغطو نفسهم بجلود الحيوانات ونسايل قشور الشجر!
حقنا نبارك ع المصنع الجديد, ونشكر كل اللي اللي بيساعدو المصريين يفتكرو تاريخهم ويجددو ثقافتهم ويفتخرو بهويتهم الوطنية بمجرد إسم له رمزية تساعد ف تنشط الذاكرة القومية!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.