الاسم الرئيسي للنيل ف زمن مراحل اللغة المصرية القديمة هوه “حعبي”. اللي اتصرف وبقا “حابي”.
شوفو ف الصورة حروف الاسم من حروف المدو نتر اللي مشهورة بإسم الهيروجليفي. واتخيلو اتصرفت اززاي عشان توصلنا ف صورة “حابي”.
طيب الاسم الحالي “نيل” وصلنا اززاي من اليوناني نيلوس واللاتيني نايل والعربي نيل؟
يعني معنا كده إن إسم أهم أثر حضاري حي ومتواصل ف حياتنا من عشرات ألاف السنين بنقوله باسم أجنبي؟
الواقع اننا لازم نفهم طريقة المصريين. كل حاجة لها أكتر من إسم. والأجنبي بيختار من الأسامي المصرية دي اللي يناسبه. أو المناسب اللي يقدر يصرفه حسب عاداته اللغوية.
ده حصل مع أسامي مصر نفسها اللي بتزيد عن عشرين إسم أهمهم “كمت”.
الأوربيين اختارو اسم اجبت واجبتوس من الجدر المصري الأصلي “جبت”.
الأسيويين أشوريين وفينيقيين وعبرانيين وعرب اختارو إسم مصر من الجدر المصري الأصلي ما-صا-رع.
بنفس الطريقة نلاقي أسامي قديمة كتيرة للنيل. منها:
*حعبي (حابي)
*عينو
*عحا (احا)
*نون-ور
*نتر-عا (اتروعا/ اترعا)
دي أسامي صريحة وجدور أصلية للنيل. نضيف ليهم إسم أو جدر من كناية بمعنا الفيضان “نير/ نيل” .. أهو جدر الكناية المصري ده بقا حظه ف الانتشار بالكناية أكبر من كل الأسامي المباشرة للنيل.
كمان الجدر المباشر نترعا. وصل لمرحلة القبطي “اتروعا” ومبقاش يتقال عن النيل انما نزل درجتين تلاتة للتعبير عن الفروع الصوغيرة “ترعة”.
……..النيل حابي . النيل السعيد . وجوده وجودنا . وسعادتنا ف وجوده. حتا السعادة نفسها اتصرفت ف بعض اللغات لاسمه السعيد حابي أو هابي.
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.