تامن شهر من شهور السنة المصرية، اسمه: شهر برمودة!
ده الإسم اللي وصلنا من آخر مرحلة، بعد مشوار طويل من النحت والتصريف!
قوايم شهور السنة من زمن الأسرة 12 فيها نفس الشهر بإسم: (رنوتة/ رنودة)!
بس أما كانت بتيجي سيرة الشهر ده أيام الملك (ونيس) – أسرة خامسة- بيظهر الإسم الأصلي: (رع-نينت)!
يعني أسامي الشهور اتغيرت، مرت بمراحل، وكتير من حروفها اتشقلبت واتلخفنت وظهرت واختفت، يعني اتطورت أسامي الشهور واتطبقت عليها كل قواعد التصريف!
وآدي صورة لإسم شهر برمودة من مرحلة الحرف الهيروجليفي:
رنوتت/ رنوتة = اسم ربة الحصاد/ اسم الشهر التامن فـ التقويم المصري!
الكوبرا هنا هيه رمز ربة الحصاد!
طب ايه حكاية الكوبرا, اللي مرة نلاقيها رمز للوجه البحري (واجت/ وجه) ربة الحماية، ومرة تانية نلاقيها ع القورة بتاعت الملكات والملوك، رمز لربة الصحة (أعت)، اللي لسة لدلوقتي رمز للأجزاخانات!
طب ايه علاقة الحصاد، وفترة نضوج المحاصيل بالكوبرا؟
السؤال ده جاوبت عليه فـ كتابي #الأعياد، من ذكرياتي الشخصية أيام الطفولة فـ الغيط، كانو بيحذرونا نقطف سبل (سنابل) القمح أو قرون الفول الحراتي أو أي خضار من غيطان الجيران، وان اللي هيعمل كله هيقرصه تعبان الغيط!
يعني كانت أسطورة الكوبرا (رنودة) اللي بتحمي المحاصيل، نوع من الحراسة زاي خيال المآتة!
شهر برمودة، شهر حصاد المحاصيل، وشهر الفسحة فـ الغيطان، وكمان شم انسيم!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.