الحب مش موجود عشان نتوجع وقلوبنا تتكسر، ولا عشان ناس تتحكم فينا وتجرحنا، ولا هو حب تملك وخلاص، إطلاقا.. الحب اتوجد عشان يكون مصدر الأمان والسعادة والراحة، عشان نتسند على بعض ونحس ببعض، مش عشان نكسر بعض وكل واحد يطلع على جثة التاني.
الحب مش خناقة عشان نشوف مين الأقوى ومين اللي هيمشي كلمته ويفرض سيطرته على التاني، الحب مش مباراة ولا مسابقة عشان نشوف مين هيكسب ومين هيخسر، الحب معادلة بين طرفين، طول الوقت ماسكين ايد بعض، كل واحد فيهم مسنود على التاني ومستقوي بيه، الحب أنك تكون مطمن مع حبيبك ومطمن بيه، أنه يكون أقرب ليك من نفسك.
تتكلم وتحكي معاه من غير ماتخاف أنه يفهمك غلط، أو تخاف أنه يزعل، أو تخاف أنه يعاقبك ببعده عنك مثلا أو يجلدك بالكلام، تقول اللي جواك واللي أنت حاسس بيه على طول بتلقائية، الحب أنك تحس بالأمان معاه، ولما تغلط يكون هو أول واحد تجري عليه وتقوله على أخطائك وغلطك من غير ماتخاف، وتبقى عارف أنه هيوجهك ويقولك الصح من غير مايسمم بدنك بكلام يوجعك، أنك لما تحزن وتتخنق من الدنيا تهرب ليه وترمي نفسك ف حضنه اللي أنت عارف أنه المكان الوحيد اللي هترتاح فيه، أنك لما تفرح تجري عليه عشان فرحتك تكمل بيه.
.
الحب حاجات كتير أاووي حلوة وإحنا اللي بنشوهه واحنا اللي بنحوله لعلاقة تخنق وتتعب وتكسر، الحب أنك تفهم حبيبك وتحس بيه وتقدر قيمته، مش لازم تحصل حاجة تزلزل العلاقة بينكم عشان تتغير وتعرف قيمته، أو حتى تحسسه بحبك، الحب أنك تتغير وتغير من نفسك عشان حبيبك، خاصة لما يكون هو يستاهل أنك فعلا تتغير عشانه.
الحب أنك تسامح وتعدي وتغفر لحبيبك، طالما بيحاول يصلح من نفسه ويعمل كل حاجة عشان يرضيك، الحب أنك تتمنى الخير للإنسان اللي حبيته لو حبيته بجد يبقي هتتمناله الخير والسعادة في حياته، هتتمنى أنه يكون دايما كويس وفرحان ومبسوط.
اسندو على بعض، داوو جروح بعض، استحملو وحاربوا عشان توصلوا، بلاش الخوف والجبن يتملك منكم، عرفوا اللي بتحبوهم قد إيه هما غاليين عليكم من اهتمامك بيهم،
خليكم أنتم الحضن اللي ننسى جواه كل تعب الدنيا، الحضن اللي نتحامى فيه ونستخبى من غدر الناس والأيام، كفاية علاقات مرهقة بقى، كفاية نوجع قلوبنا وقلوب الناس اللي بتحبنا، خدوا الأمور ببساطة بلاش التعقيدات والكلكعة، عيشوا أيامكم بالحب وخلونا نعيش اليومين اللي باقيين في عمرنا وإحنا فرحانين بيكم وبوجودكم معانا.
كفاية بعد، كفاية هجر وخصام، كفاية ظلم ووجع، كفاية قلوب سودا الدنيا مش مستاهلة ، سامحوا، اغفروا، واتمنو السعادة والفرحة لبعض عشان ربنا يفرحكم، الدنيا مش مستاهلة، صفوا قلوبكم وعيشو الدنيا والحياة ماتضيعوش أيام عمركم ف الندم على اللي فات.