– المواطن: كلنا عارفين إن أمناء الشرطة ضربوا الدكاترة، وكلنا مش موافقين على كده، لكن كمان إحنا مش موافقين على قفل المستشفى، علشان المواطن ما لوش ذنب … هاتفتحوا المستشفى إمتى ؟
– الطبيب :
هل ترضى تتعالج في مستشفى ممكن أي حد يعتدى عليك فيها ؟ مع العلم إن فيه حوادث حصلت وتم الاعتداء على مصابين محجوزين بالمستشفيات لعدم وجود تأمين.
هل ممكن إنك تقدر تشتغل فى مكان غير مؤمن ويكون خطر على حياتك ؟.
– المواطن: .. لأ طبعا …. لكن الشرطة وعدت بتأمين المستشفى .
– الطبيب : طيب هل ممكن تطمن لما يكون اللى هايعملك التأمين، هو نفسه اللى اعتدى عليك، ولسه ما حدش حاسبه.
– المواطن: طبعا لازم يتحاسبوا بسرعة، لكن معلش ده حادث فردي.
– الطبيب: كلمة فردى يعنى عملها فرد واحد .. فاذا كان المعتدين أكثر من ثمانية …. هنسميه حادث فردى ؟
– المواطن: أنا عارف طبعا و اللى حصل ده شىء بشع …. لكن أنا أقصد إن احنا ما يصحش نعمم.
– الطبيب: إن تعرف إن فيه مستشفيات تانية كتير قريبة ( زى الزيتون ومنشية البكرى وعين شمس ) ؟
– المواطن: أنا عارف طبعا، وإحنا بنروح المستشفيات دى فعلا، لكن مستشفى المطرية قريبة من بيتى .
وبعدين إحنا سمعنا من أيام إن الموضوع قدام النيابة … يعنى أكيد أمناء الشرطة هايخادوا عقابهم .
– الطبيب: إحنا قدمنا البلاغ من أربعة أيام، لكن التحقيق لم يبدأ حتى الآن .
– المواطن: بصراحة إحنا سمعنا إن الدكاترة انتهزوا الفرصة ، علشان مش عايزين يشتغلوا.
– الطبيب: إذا كان الكلام ده صحيح، كنا قفلنا المستشفى أول ما ضربونا ( و ده حقنا )، لكن احنا استمرينا فى الشغل ، ورحنا النيابة علشان نقدم البلاغ، ولكن فوجئنا باننا أصبحنا متهمين ، وإن إحنا ممكن كمان نتحبس علشان أمناء الشرطة قدموا بلاغات كيدية ضدنا، ونتحبس فين، فى نفس قسم المطرية اللى أمناء الشرطة بتوعه ضربوبنا.
علشان كده إحنا اضطرينا نمتنع عن العمل علشان صوتنا يوصل ، وعلشان يتم محاكمة المجرمين.
– المواطن: طيب بصراحة فيه إهمال كتير فى المستشفيات ( بيقولولنا نشترى الدواء والمستلزمات على حسابنا، وساعات ما نلاقيش الدكتور موجود )
– الطبيب: أنا موافق إن فيه نقص شديد فى الأدوية والمستلزمات، لكن طبعا دى مسئولية الحكومة علشان لازم توفر الميزانية المناسبة للقطاع الصحي.
وكمان أنا موافق إن فيه بعض حالات إهمال وإحنا مش ممكن نوافق عليها، وأى شكوى بتتقدم للوزارة أو للنقابة ضد أى دكتور بيتم التحقيق فيها فورا، لكن إذا كان فيه أى إهمال بجد، هل ده يدى الحق لأى شخص بأنه يضرب الدكاترة ؟
– المواطن : . طبعا لأ … لكن المفروض يشتكى و كمان المفروض جهات التحقيق ترد على الشكوى .
– الطبيب: طبعا عندك حق ….
– المواطن: طيب علشان خاطرى … أنا بطلب إنكم تفتحوا المستشفى لغاية ما يتم التحقيق معاهم؟
– الطبيب: الدكتور اللى انضرب من بعض رجال الشرطة اللى مفروض يحموه ….واللى لسة ما تحاسبوش .. واللى هما نفسهم اللى هيعملوا التأمين الجديد للمستشفى… الدكتور مش هايحس بالأمان لأنه هيخاف من تكرار نفس الموضوع ….. طبعا الدكتور اللى بيتعامل مع أرواح المرضى لازم يركز فى شغله … تفتكر لو كنت مكانى هتقدر تشتغل و تركز فى شغلك ؟ …. طيب هل ممكن تسلم نفسك و روحك لدكتور مش قادر يركز فى شغله ؟؟؟
– المواطن: عندك حق … طيب إيه اللى ممكن يرجع الشغل بسرعة ؟
– الطبيب: الاسراع فى إجراءات بدء التحقيق علشان الدكاترة يحسوا ان الموضوع مش هايتكرر و يقدروا يحسوا بالأمان و يركزوا فى شغلهم …. وإحنا واثقين من إن النيابة هتوجه لأمناء الشرطة اتهامات كتير .
– المواطن: بصراحة إنت عندك حق، وأنا أتمنى ان المستشفى ترجع تشتغل بسرعة .
– الطبيب: وإنت كمان عندك حق، وأنا أتمنى إن المستشفى ترجع تشتغل بسرعة.
الدكتور إيهاب الطاهر أمين عام نقابة الأطباء.