في الدنيا التصنيف بالدرجات..
زي البورصة وسعر الأسهم
واسامي البوتيكات والماركات..
و الناس مقامات ..
والريس فوق
بيدوس بنعاله على روسهم
والسلطة بنات افكار الذات
والناس العاليين بفلوسهم
والزيف في النفخة الكدابة
وكتير مساكين ..
اتحطوا عشا لعالم غابة
واهوو كل ما في الكون اتغرب..
والعقل اتخرب م المتاهات
و ف وسط العتمة..
فيه طيف لامع
ونشيد بيهلل للسامع ..
النجم اللى بعيد ..
اهوو قرّب
والخبر المستور اتسرب..
مولود فى الفقر عشان يغني
واختار الطبقات الدُنيا ..
علشان الدنيا اللي بتغري..
وعشان اللى اتشعلقوا فيها ..
ينسوا المتاهات اللي تنسّي ..
ان العالي لينا اتواضع..
وصبح لخلاص الناس خاضع ..
وعشانه النجم يصير ساطع ..
ويجيب اليأسان اللي بعيد ..
ويحط ف كل قديمنا جديد
ويملا الارض بشمسه سلام
فزماننا يهلل بالتمجيد ..
ويشد خطوط
على كل ما كان ..
ويخط نشيده ببُنط عريض ..
” كل ما فى الجاي عيد “
كل الحزانى ..
واللى مش لاقيين مكان ..
واليتامى واللى ماداقوش الحنان
واللي م العار ..
اختفوا ورا كوم بيبان
كلهم بحمولهم المتجدره ..
جايين على المزود هنا..
جايين على حيث الأمــان