انا مش لاقي كلام يوفيكي..
او قصة رومانسية تليق بيكي..
اصل حبك مهوش عادي.. والدنيا تحت رجليكي..
و من اول يوم في بطنك..
كنت حاسس بفرح قلبك..
وكان كل يوم بيعدي كنت تمالي بفضل جنبك..
تعبتي في حاملي وولدتي..
وتعبتي كمان في شهادتي..
وحلمك الكبير تشوفيني..
افتح بيت ولو علي قدي..
اصلك انتي احن ام انتي تملي بتكوني سندي..
وساعه تعبي شلتي المر وبعتي عني اوهامي..
ومن اول ما كنت عيل ولحد ما بقيت راجل بشنبات..
كنت تملي تديني حنية وعمرك في يوم ما قولتيلي هات..
حتي وقت ما بتكلم عنك بفضل واقف وفي سكات..
وحبك في قلبي هيزيد ويطرح اكيد لحد الممات..
من اول ما كنت بحبي كنت سامع صوت كلامك..
ولما كنتي تحضنيني كان قلبي يحس بحنانك..
ولما كبرت شويتين كنت بحلف بحياتك..
ولما جيت اكتب عن الام القلم وقف في حيرة..
اصل بكتب عن احلي ام اصلا امي في عيني اميرة..
انتي اجمل من اي ست انتي اجمل من اي جميلة..
وانا جي اقدملك شكر علي الحنية اللي شيلهالي..
من اول ما كنت صغير ولحد ما هتشيلي عيالي..
وشكرا شكرا شكرا علي كل حاجة عملتهالي…