(اهداء الى شهيدة الوراق الطفلة مريم )
الكلام فى قلبى علقم
يا مريم
يا ندى وابتسامة وعلامة
كان القمر بيقف على رجليه
مشدود
مستنى ضحكتك
وشقاوة العود
ولمسة ايديك البلسم
يا مريم
والشمس كانت بتحسدك
يا غالية على رقتك
مين ياخدنى لسكتك
وارتاح من كرابيج الدمع
اللى بتلسع روحى
وبتخلع ننى الشمع
وتولع لهيب فراقك
من على حجرى
يا حزنى
على النور اللى عتم
يا مريم
عملتى ليهم ايه
وانتى معندكيش غير شهادتين
شهادة ميلادك
وشهادة معموديتك
ديه اللى خوفهم من قوتك
قتلوكى عشان مسيحيتك
يا بنتى يا ضنايا
مش عايزة تاخدى لعبتك
اللى رعبت جبابرة
شاب شنابهم
قطع دراعهم
اللى قطعت ذرعتك
وسممت النسيم
يا مريم
مين هيدغدغ قلبى
مين هيفرد عمرى
مين هيدعى لربى
مين هيغسل دمك من على شجرى
وهى مغرقانى من جذرى لثمرى
دمك يا بنتى غسلنى
عايز ابوسك فى كفنك
وانت فى حضن الملايكة
واجنحة الشاروبيم ..بتمنعنى