أثار قرار مغادرة اللاعب محمد صلاح منتخب مصر والعودة لانجلترا للتأهيل جماهير الكرة المصرية التى رأت أن هذا القرار خاطئ وان صلاح يتهرب من مسؤوليته تجاه المنتخب، كما أن قرار اتحاد الكرة المصري مخزى.
وكتب الإعلامى الرياضي محمد فارس ” والله دمرتوا سمعة الكورة في مصر وخربتوها .
اتحاد كورة ادمن الفشل، يطلع بيان أن صلاح هيغيب مباراتين و يطلع يورجن كلوب يعلن عن كلام مختلف وان صلاح هيسافر انجلترا يتعالج وممكن يسمحوا له يرجع على النهائي لو بقى كويس
فيجري اتحاد الكورة يطلع بيان جديد ان اللاعب هيسافر فعلا يتعالج في انجلترا بعد ما كلوب اتكلم . ويقولوا على أمل ان صلاح يرجع المنتخب تاني . على أمل . اللي هو مطلوب اللاعيبة توصل نهائي لحد ما صلاح يتعالج برا ممكن يرجع لهم يشيل الكأس
مش قادر تحترم نفسك كاتحاد وتصارح الجمهور قبل ما الناس تعرف من انجلترا ، مش قادر تحترم اسم منتخب مصر وتقول ان المجموعة اللي موجودة هي اللي هتكمل البطولة وصلاح خارج البطولة
محدش قادر يقول ان مش مفترض كابتن المنتخب يسيب الفريق ويسافر يتأهل برا وده كان مستحيل يحصل مع اي لاعب تاني ولا حصل في تاريخ المنتخب داخل اي بطولة ودي اصابة في الخلفية يعني مش تأهيل محتاج تدخل جراحي او حساس
نفس الاتحاد ده لاعيبة الاهلي النادي سافر من غيرهم كاس العالم للاندية بسبب امم افريقيا . ولما البطولة خلصت تم التواصل مع المسؤولين ان اللعيبة تسافر من الكاميرون للاهلي في كاس العالم من غير ما ترجع مصر الأول . خرج تصريح رسمي ان لا لاعيبة الاهلي هترجع مصر الاول مع المنتخب وبعد كده يسافروا
اتمنى استقالة اتحاد الكرة بعد نهاية البطولة ايا كانت النتيجة كفاية بجد اللي عملتوه في سمعة الرياضة المصرية .