مصطلح جديد لانج أول من أطلقه هى فرقة دافيد.. يعنى ايه بقى ؟؟ …. ركز معايا Meta ما وراء Copt قبطى Hymnology علم دراسة الألحان علم ” دراسة الأبعاد الخمسه للألحان القبطية ”
ايه هما بقى الأبعاد الخمسة دول و ايه أهميتهم ؟؟؟
١- البُعد الايمانى العقائدى كل لحن مهما كان صغير ، حتى لو عبارة عن كلمة واحده ، هو بيحمل جزء مهم من ايمان الكنيسة بداخله ، هتقدر تعرف الايمان ده و تفهمه لما تعرف ايه هو البُعد الايمانى ل اللحن .
٢- البُعد الطقسي اللى هو علاقة اللحن بالطقس ( نظام و ترتيب الوقت اللى بيتقال فيه اللحن) اللى بيتقدم بيه و علاقة الطقس كمان بنغمات هذا اللحن، وازاى ان الاثنين ( اللحن و الطقس ) بيشتركوا فى شرح ايمان الكنيسة صورة و صوت !
٣- البُعد الموسيقي و ده هيخليك تحس ازاى ان كل نغمة و كل مقام موسيقي (تسلسل نغمي) و كل ضرب ايقاعى (مناطق الضعف والقوة فى اللحن ) و كل ميزان (تقسيم زمنى) فى اللحن بيعبّر عن الكلمة و المناسبة الطقسية ، و كمان عن الحالة الروحية اللى الكنيسة عايزانا نعيشها فى الوقت اللى بيتقال فيه اللحن.
٤- البُعد التاريخي الألحان القبطية هى أقدم حضارة موسيقية عرفها التاريخ … و كل لحن نقدر نعرف من المخطوطات و من كتب التقليد و من المؤرخين و غيرها من المصادر التاريخية، اللحن ده اتألف امتى ؟ و مين اللى قام بتأليفه؟ و لما تدرس البُعد ده هتلاقى ان الألحان القبطية قام بتأليفها و تلحينها بطاركه و أباطرة و قديسين و ألفوها بدقة شديدة مش أى حاجه و خلاص.
٥- البُعد الروحانى ☁️ الألحان القبطية اتألفت علشان تسمو بالروح للسما فتعلمنا القيم الروحية و المبادىء الساميه، و تبسط لينا ايمان الكنيسة من خلال نغمات عذبة و صدقنى لو قلتلك انك لما تغوص فى هذا البُعد بالذات هتلاقى نفسك بتحُلّق فى السماء من خلال نغمات هذا اللحن