جدودنا اتعاملو مع النيل, كأنه انسان عظيم, أو كائن مقدس حي وعايش معاهم يوم بيوم ميات وآلاف وملاينن السنين!
تشوف النيل فـ الصورة تلقا مع اسمه مخصص الإنسان, وكمان مخصص الماية (زجزاج موجة النيل) ومعاهم مخصصات للمساحة والمكان والزمان!
يعني النيل, بالنسبة للمصري, عمره ما كان مصدر ماية وبس!
النيل حياة, أرض وماية وجيرة وعشرة عمر أجيال!
وحكاية النيل (حعبي/ حابي) مع مصر والمصريين بتبدأ من زمان أوي!
ولازم نسأل نفسنا, اذا كانت حضارة مصر سببها النيل, طب ما أفريقيا ماليانة أنهار, وأوروبا وآسيا وأمريكا عندها الأمازون وغيره من الأنهار, ليه الحكاية بدأت فـ مصر, ومكنش ممكن تبدأ فـ أي مكان غير مصر .. ليه؟
النيل نفسه نهر طويل وبيمر بشعوب وأمم كتير أقدم من مصر فـ الوجود, انما مش أقدم منها فـ الحضارة!
اشمعنا بقا النيل ييجي فـ مصر وتهدا ثورته, يخفف حموله, ويبوح بكل أسراره؟
الحقيقة انه سؤال مش سهل, وعشان كده سنة 2014 خصصت له كتاب كامل اسمه: “الكنانة: كيف بدأت الحضارة” حاولت فيه أجاوب وأوضح سر بداية الحضارة فـ مصر, وسر علاقة النيل بمصر, وعشق المصريين للنيل!
طبيعة أرض مصر اللي فيها النيل (مصدر ماية دايمة) محمية بجبلين من الشرق والغرب, طول المسافة من جبل سلسلة فـ أسوان لهضبة الجيزة, وكأنهم سورين عاليين حاميين النيل بسمكه وطيوره وحيواناته ومعاهم الإنسان, دي الخلطة اللي وفرت الإستقرار الطويل اللي لازم يكون موجود عشان تبدأ أول شرارة من مظاهر الحضارة!
بداية الحضارة فـ مصر لها قصة بسيطة وسهلة, حتا لو مفيش آثار تشهد عليها, انما مع وجود الآثار, والقراين والأدلة اللي بتأكد قصة حضارة مصر تبقا قصة مفهومة ومعقولة!
يعني حكاية النيل, مش بس حكاية شعب قدم للبشر أول وأساس مظاهر الحضارة, لأه … النيل حكايته لازم تكون حكاية كل انسان أصيل يعرف الواجب ويقدر الأصول ويحفظ الجميل ويصون المعروف!
النيل حواديته وصحبته مع المصريين ملهاش نهاية, المصري عارف كده والتاريخ بيأكد كده, والدليل ان كلمة شهيد أول ما ظهرت فـ الوجود ارتبطت بالنيل, يعني فـ وقت من الأوقات, كان الشهيد هوه اللي يموت فدا النيل, وبعد كده بقا كل غريق فـ النيل شهيد!
أول حرب سجلها التاريخ حرب توحيد الأرضين, أساسها النيل, تحرير النيل وضمان جريان مايته, وعلامة محرات المر اللي شايلها الملك, علامة تنضيف وتسليك مجاري ماية نهر النيل!
النيل عاشق لمصر والمصريين, عشان محدش بيجود بخيره ويبوح بسره لأي حد!
كمان المصريين عشان خاطر النيل, عندهم استعداد يجودو بفكرهم وعلمهم, ولو وصلت كمان لحياتهم!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.