لولا الماضي ماكان فيه حاضر ولا بقا فيه مستقبل!
اللي ملوش تاريخ ملوش مستقبل.
تاريخ الانسان بيشكل مستقبله
عشان كده الأمم اللي ملهاش تاريخ بتشتري تاريخ أو بتستلف تاريخ أو تسرق تاريخ غيرها!
أمريكا اشترت تاريخ أوروبا
وأوروبا استلفت تاريخ الإغريق
وإسرائيل سرقت تاريخ العالم
الكلام ده للناس اللي بيهاجمو حراس الهوية المصرية. وفاكرين ان الكلام عن مرحلة تأسيس الهوية المصرية ماضي وتاريخ معدش له لازمة!
جدودنا كانو واعيين لأهمية الماضي. عشان كده حضارتهم فضلت آلاف السنين وأسست كل اللي العالم بيتمتع بيه دلوقتي من مظاهر الحضارة ، الأكل والشرب والزرع واللبس والفرحة والدوا والصيد والمباني والمعامل .. لخ .. اقرا ف أي علم أو صناعة أو أدب أو فن هتلاقي الجدر والتأسيس بدأ من مصر.
اهتمام جدودنا المصريين بالماضي لخصوه ف فترة اسمها حكم النترو أو المرحلة اللي حكامها من المقدسين. وعشان يضمنو مستقبل لأرواحهم بعد الموت كانو بيتقمصو صفات النترو المقدسين دول!
شوف النصوص دي من كتاب “برت-م-هرو”:
شعر المرحوم جدايل شعر نون
وش المرحوم تدويرة وش رع
عيون المرحوم وسع عيون حتحور
دراعات المرحوم عضلات دراعات كبش منديس
حنجرة المرحوم سالكة زاي حنجرة المغنية ماريت
ضهر المرحوم جامد زاي ضهر سوت .. لخ!
الإحتفال بالأعياد والتقويم واللغة رموز بتشكل هوية واضحة للمستقبل!
#اتكلم_مصري واوزن كلامك!
#اكتب_بالمصري يعلا مقامك!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.