كل انسان طبيعى عنده حلم.. حلم بدخول السماء أو حلم بدخول كلية معينة، حلم إن يربى عياله احسن تربية، حلم اى فتاه بفارس الأحلام اللى بيجى ويخطفها.. حلم الشفاء من مرض، حلم بالستر..
كلنا عندنا أحلام فيه منها اللى بيتحقق وفيه منها اللى مش بيتحقق، لو الحلم اتحقق بتكون معاه رسالة وبرضو لو ماتحققش بتكون معاه رسالة.. لو الحلم اتحقق الرسالة بتكون انه ربنا شايف وحاسس بيك وشايف تعبت قد ايه عشان وصلت للحلم دا، ولو الحلم ماتحققش بتكون الرسالة إن ربنا خايف عليك وكان ممكن الحلم دا تكون فاشل فيه.
ربنا دايما بيدى كل حاجة بالمظبوط، وهو راسم خطة حلوة ليك حتى إن فشلت في حاجة معينة اكيد ستنجح فى حاجه تانى، لأن ربنا عارف كويس قدراتك وقوة تحملك للحاجة اللى انت عايزها. يمكن مادلكش الحاجة دى عشان عارف انك مكنتش هتستحمل اللى فيها.
ربنا عنده كتير اوى فوق مايتخيل العقل، وشايف اللى انت مش شايفه وعارف كويس ايه اللى ممكن يحصلك، هو ببساطة بيمنع عنك الشر حتى لو كنت شايف ان مفيش شر فى الحلم، بس هو بيقولك ستفهم فيما بعد.
اهم حاجة انك تحلم وتصدق حلمك وانك تعيش لحلمك وتعمل كل ما فى طاقتك علشان حلمك واتاكد ان ربنا هيكون دايما معاك. وعدم وضوح شكل المستقبل كتير بيخوف وبيقلق بيفضل الواحد شايل هم وبيحسبها بالورقه والقلم وهو مش مستوعب انه شايل هم الحاجه اللى مش بتاعته اصلا.. ده تدبير الله لك مش شغلنتك ولما بتشيل هم شغلانه مش بتاعتك طبيعى تتقل على دماغك.. انت ماتخلقتش علشان تقلق من اللى جاى، ربنا كفيل بيك وبحلمك.. ستفرح لان الله سيفتح لك الباب الذى طالما كنت تحلم به ولما ينفتح ، الله سيجعلك تدخل منه الى الفرحه والبركه والنجاح.
