أسئلة كتير عن أسامي الأشخاص والبلاد اللي لسة فـ كلامنا الحالي من مراحل لغتنا القديمة!
طبعن فيه أسامي بلاد كتير من بحري زاي بنها ودمنهور وطنطا ورشيد ودمياط ودسوق وسخا وشربين وبلقاس وبرامون وبلبيس وبلطيم وسمنود .. لخ, من جدور مصري أصلي, وكمان أسامي أشخاص زاي مينا ورمسيس وأحمس وتحتمس وزوسر!
اللي مش واخدين بالنا منه بقا ان فيه أسامي كتيرة من جدور مصري حتا لو فيها شبه بالعربي، زاي عاطف وعواطف وعطيات وشكري ورمزي وباهي وبهية وخضرة وخضير .. لخ!
فـ البوست ده جمعت أسامي البلاد – من قبلي- اللي موجودة فـ رواية رادوبي, وكمان أسامي الشخصيات الرجالي والستاتي اللي فـ الرواية!
لاحظو اني حاولت فـ الرواية دي أصور حياة المصري القديم فـ نهاية الألف التالتة قبل الميلاد – أسرة 6- بأقرب لغة بين العصرين – القديم والحالي- بنفس أسامي المهن والمواد والأكل والشرب والدوا والهدوم, وكمان أسامي البلاد زاي ما كانت, وأسامي الأشخاص!
من أسامي البلاد:
صوان آبو (أسوان)/ قوص/ مناف/ قفط/ دندرة/ قنة/ دشنة/ جرجة/ سوحاج/ أخمين/ طحطة/ طما/ سيوطي/ ديروطي/بهنوسا/ حروان (حلوان) …….!
من أسامي الولاد والرجالة:
سنفر (بطل الرواية)/ وزير (الإسم الأصلي لأوزوريس)/ تحوتي/ عطفي/ زنون/ باقي/ مينا/ بانوبي/ سمير/ نوري/ فتاح (تصريفة بتاح)/ حسي/ مينو/ حمص/ حمو ……!
من أسامي البنات والستات:
ستوتة/ نبية حوة/ حوة/ آسية/ أزة/ حصة/ نينت/ ستيتة/ سمر/ حتحور/ هاتور/ مارية/ نبيتو/ زيزت/ سنفرة/ نجفة/ إبانا/ كنة/ بطرا/ تاتويا/ ماريكا/ سومة/ مروة/ وداد/ سوسن/ هانو/ رادوبي …….!
الأسامي اللي من رواية رادوبي مجرد مثال ع الأسامي الكتير اللي متصرفة من جدور مصري أصلي, زاي الجدر “سمح” اللي اتصرف منه أسامي: سامح وسماح وسميح وسميحة وسماحة ..لخ, والجدر “ند” اللي اتصرف منه أسامي: ندا وندية, ونادي ونادية .. لخ!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.