لما بننزل نشتري هدوم في العيد بننزل نتفرج على محلات كتيرة، ساعات بنلاقي هدوم بتعجبنا بس مش شرط تناسبنا، وساعات بنلاقي هدوم بتعجبنا وتناسبنا بس مش في قدرتنا إن إحنا نجيبها دلوقتي .. يمكن بعدين نقدر، وساعات بنلاقي هدوم مابتعجبناش ومتنسبناش عمرنا ساعتها ما بندخل لصاحب المحل نتخانق معاه لمجرد إن اللي عارضه مش عاجبنا.. بنعدي من قدّامه ولا كأن في حاجة حصلت ولا كأننا شفناه.. ده إحنا كمان مش بنخش ننصحه يعرض أيه ومايعرضش أيه .. هو حر يعرض اللي يعجبه وأنت حر تشتري منه أو تشتري من غيره أو ماتشتريش خالص.
الفيس بوك كده بالظبط مجرد فاترينة للأفكار، عدي واتفرج على كل الفتارين اللي عندك خد اللي يناسبك وسيب اللي ماينسبكش، أصلك لو اشتريت من كل المحلات هتبقى لا مؤاخذة بلياتشو ملكش ملامح وفِي نفس الوقت أنت مش مصلح اجتماعي؛ علشان تدخل عند كل واحد وتعلمه يكتب أيه وميكتبش أيه؟ أصل بصراحة مش مفترض إن الكام مليون واحد اللي على الفيس بوك يكون ليهم نفس الدماغ، لازم نتفق أحيانًا ونختلف أحيانًا أخرى، وافتكر دايما إن الفيس بوك عامل لايك 👍 علشان لو حاجة عجبتك تدوس عليها بس الحمد لله معملش 👎 ديسلايك علشان لو حاجة معجبتكش تعبر من أمامها صامت بسلام.