نشرالمذيع التلفزيوني ومقدم البرامج، إسحق يونان، منشور على حسابه الشخصي بشبكة التواصل الاجتماعي فيسبوك، يتكلم فيه عن المقاول الهارب، محمد علي، واما أثاره الأخير بانتقادت وجهها للدولة، حول تعاملها مع فيروس “الكورونا ” ومشاكل القطاع الصحي حيث نشر قائلاً :”الكلام على ايه ؟
عاوز تعرف الكلام اليوميين الجايين على ايه ؟ أقولك انا
امبارح الخروف اللي اسمه محمد علي ابتدى يرجع و يعمل ڤيديوهات.. و الموضوع الخاص بالڤيديو هو انتقاد أي حاجه عملتها الدولة فى موضوع كورونا بما فيها ال٥٠٠ جنيه للعمالة الغير منتظمة!..
و فى نفس الوقت خرفان قناة الجزيرة مش بيتكلموا عن اي حاجه فى مصر غير عن موضوع كورونا و تهييج الناس ضد الدولة.. و هكذا كل صفحات و قنوات الإخوان . كلهم ابتدوا فى نفس التوقيت اللي محدده الأسياد فى قطر و تركيا .
وتابع إسحق :”القصة بإختصار تسييس أزمة كورونا فى مصر و نشر حالة الغضب بين الناس.
حد يسألني و يقولي و انت جاي بقى تكتب كلمتين تطبيل و تقول مفيش مشاكل ؟
لا يا حبيبي.. المشاكل بالكوم و القطاع الصحي على اده جداً جداً.. بس بيحاولوا على قد ما يقدروا.. يعني مثلاً النهاردة تم توفير دور كامل فى كل مستشفى للإصابات من الأطقم الطبية و عمل تحاليل لازمة و سريعة لكل المحتاجين و الفترة الجايه هتبقى افضل..
لكن ماتنساش بردو ان احنا المنظومة الصحية فى مصر بعافية جداً من الأول و احنا بلد نامية و ضعيفة اقتصادياً و اللي بيحصل فى مكافحة كورونا هو أقصى ما يمكن ان الدولة تقدمه و مع ذلك طول الوقت من حقنا نطلب المزيد.
و عاوز أفكرك ان الخروف محمد علي اللي كان دايماً يحكى و يتحاكي بأوروبا و المنظومة الصحية فى الدولة اللي هو عايش فيها (اسبانيا) البلد دي انهارت صحياً بعد ما وصلت الاعداد لما يقرب من ٣٠٠ الف إصابة !
و البلد اللي مشغلاه (قطر) اللي تعداد سكنها ااقل من شبرا فيها ما يقرب من ٥٠ الف إصابة و رغم الفلوس و الإمكانيات مش عارفين يسيطروا ! و تركيا مش هقولك الأخبار ايه؟ ادخل شوف بنفسك.
وقال :”الحكاية بإختصار… ان لا محمد علي انت تهمه فى حاجه و لا قناة الجزيرة يهمها حياتك و لا قنوات الإخوان مغرامين بالأطباء .
الحكاية ان رغم الأزمات الاقتصادية فى مصر.. الشعب متماسك و بيحب بلده و عمال يهلل لابطال الجيش كل يوم و العيال جايبه مسدسات بيلعبوا بيها فى الشارع بعد مسلسل الإختيار.. و الكلام ده بيوجع أوي.. و بيخلي الناس اللي بتدفع الفلوس بتضغط على الناس اللي تحتها زي محمد علي و بقية الخرفان..
اوعى تسمح ان يتم استخدامك كاداه للناس دي و تروج لأفكارهم المشبوهة و اغراضهم الحقيرة… فيه مشاكل حقيقية فى المنظومة الصحية كتير و هتكتر اكتر طول ما الاعداد بتزيد.. و فيه ناس بتعاني جداً عشان تعمل تحليل pcr او تلاقي عربية إسعاف.. الإمكانيات ضعيفة فعلاً.. بس ماحدش متقاعس او مقصر.. ربنا يحفظ بلدنا و يشفي كل مُصاب و كل مريض.