عبر نشطاء موقع التواصل الاجتماعي “فيس بوك”، عن إعجابهم الشديد للرسالة التي يطرحها إعلان طحينة ، حيث دارت فكرة الإعلان حول مجموعة من القطط التي تشرح المعاناة التي يعيشها قط الشارع نتيجة لغلاء الأسعار، والظاهر في الفكرة أن الطحينة تجعل الإنسان يأكل العظم قبل الجلد للذة طعمها، ولكن للنشطاء كان تأويل آخر.
اعتبرت سوزان أن هذا الإعلان يستحق :”الإعلان ده يأخذ أوسكار أحسن إعلان وأحسن فكرة في رمضان 2017 لحد دلوقتي. مش مكلف أولاً، مفيهوش نجوم هتأخذ أجور خيالية، مفهوش حاجة تستفز المشاهد الغلبان، معمول بطريقة تحفة تضحك الحجر!! شابوه قطط الشريف”.
علقت نورا بجزء من كلمات الإعلان، قائلة :”بقف أربع ساعات أنونو لمدام ميار، بس الواضح مبقاش فارق معاها، البقدوونس بيتسف من تحت الكفتة”.
وفسر أحمد رسالة الإعلام من وجهة نظره، قائلًا:”الإعلان بيوصل رسالة بس بطريقة غير مباشرة، عاوز يقول إن الناس جاعت، الناس معادتش لاقية تاكل من الغلا اللي وصلنا له، الناس بقت بتاكل الجلد و العضم، لدرجة أن معادوش بيرموا حاجة للحيوانات”.
ونفرت هند من بعض التعليقات المسيئة للقطط:”تعليقات بعض الناس تدل إن قلوبهم ميتة، بدل ما تقولوا قرف ادوا القطط أكل، الرسول قال في كل ذات كبد صدقة أجر، بس أنتم بتوع شعارات لا ترحموا ولا تسيبوا رحمة ربنا تنزل”.
ولم تعتبره خليدة إعلانا مضحكًا، بل قهريا:”مضحكتش عليه لأن فعلا حال قطط الشوارع يصعب على الواحد، حال الناس تدهور ومعاها باقي الكائنات سواء القطط اللي فعلا محدش بيديهم أكل أو ميه ولا النبات اللي الناس بتستخسر تسقيه عشان الماية غليت”.
فيما رأت غادة أنه :”الإعلان ده بيمثل الشعب بجد والكحرتة اللي وصلها دول واللي بياكلوا فراخ ولحمة ما بالك باقي الشعب الغلبان”.
وأكد الكينج على روعته:”إعلان بصراحة روعة وقفشاته تحفة وفعلا الرحمة حلوة، لما تكون بتاكل شاندويتش وتلاقي قطة وتقطع من رغيفك حتة للقط ياكلها والله سعادة لا توصف”.
واعترضت رنا على من تناولوا فكرة الإعلان بسطحية، قائلة:”أنا أكتر كلمة اتقالت في الإعلان ده هي منكوا لله يا بني آدمين، لأن فعلا احنا بقينا وحشين قوي والدليل على كده إن في ناس سايبة فكرة الإعلان والمقصود منه وماسكة في القطط”.
فيما اعتبرته إيمي إعلان مستفز وتحريضي:”ده إعلان غبي جدا، بدل ما نسيب أكل على جنب بنية يطعم حيوان وناخد ثواب، بيقولنا قرقشوا العضم ومتسبوش حاجة، إعلان مستفز، وبعدين طحينة اية اللي هتخليني ناكل حتي بقدونس الكفتة”.
ومزح إسماعيل مزحة منطقية:”يا ترى القطة دي أخذت كام عشان تطلع في الإعلان، مش أحسن أنها كانت تديها لحقوق القطط وعلاج القطط”.